Баргузории форуми сармоягузории Тоҷикистон ва Қазоқистон дар Душанбе

Сарвазири Қазоқистон Роман Скляр барои иштирок дар ҷаласаи 16-уми Комиссияи байниҳукуматии Тоҷикистон ва Қазоқистон оид ба ҳамкории иқтисодӣ, ки қарор аст фардо 17 март баргузор гардад, ба Душанбе ташриф овардааст.

Ба иттилои Кумитаи давлатии сармоягузорӣ ва идораи амволи давлатии Тоҷикистон, дар ин ҷаласа масъалаҳои тақвият бахшидани ҳамкории иқтисодию тиҷоратӣ ва илмию фарҳангии ду давлат матраҳ мегарданд.

Бино ба иттилои манбаъ, ҳамчунин дар назар аст пагоҳ дар Душанбе Форуми сармоягузории Тоҷикистон ва Қазоқистон баргузор гардад, ки дар он масъалаҳои муҳими тавсеаи ҳамкории ду кишвар дар бахши иқтисоду тиҷорат баррасӣ мешаванд.

Ҳамасола нишастҳои Комиссияи байниҳукуматии Тоҷикистон ва Қазоқистон доир мешавад ва дар ҳар ҷаласае дар ҳаҷми миллионҳо доллар шартномаҳои тиҷоратӣ байни ин ду кишвар баста мегардад.

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.