Вохӯрии навбатии ҳайатҳои Тоҷикистону Қирғизистон оид ба делимитатсия ва демаркатсияи сарҳади давлатӣ дар Бишкек баргузор хоҳад шуд.
Вазорати корҳои хориҷии Тоҷикистон гуфтааст, ки “рӯзҳои 21 – 26 июни соли 2022 дар шаҳри Душанбе вохӯрии навбатии гурӯҳҳои кории топографии ҳайатҳои ҳукуматии Ҷумҳурии Тоҷикистон ва Ҷумҳурии Қирғизистон оид ба делимитатсия ва демаркатсияи сарҳади давлатӣ баргузор гардид.”
Вазорати корҳои хориҷии Тоҷикистон бидун нашри ҷузъиёти ин вохӯриҳои панҷрӯза дар пойтахти Тоҷикистон гуфтааст, ки ин нишаст “дар фазои дӯстӣ ва ҳамдигарфаҳмӣ” баргузор шуда ва аз “натиҷаи вохӯрӣ Протоколи дахлдор ба имзо расид.”
Гуфта мешавад, “Ҷумҳурии Тоҷикистон дар шимолу-шарқ бо Ҷумҳурии Қирғизистон ҳамсарҳад мебошад. Дарозии умумии сарҳади Тоҷикистону Қирғизистон тахминан 987 км-ро ташкил мекунад.”
Дар манотиқи назди сарҳадии Тоҷикистону Қирғизистон, бахусус дар шаҳри Исфара ва ноҳияи Ҷаббор Расулов тайи ду соли ахир дар хеле мавридҳо вазъият буҳронӣ гардида, ба ҳисоби миёна моҳе як ё ду бор ҳам садои тирпарронӣ аз ҷониби сарҳадбонони ду кишвар ба қайд гирифта шуда ва дар хеле мавридҳо талафоти ҷонӣ низ гузориш мешавад.
