Барои ифтитоҳи мактаб дар вилояти Суғд сарвазири Узбекистон ширкат меварзад
Бино ба навиштаи хабаргузории “Азия-Плюс” сарвазири Узбекистон Абдулло Орипов барои иштирок дар маросими ифтитоҳи мактаби таҳсилоти миёнаи умумӣ, ба Тоҷикистон ташриф меоварад.
“Азия-Плюс” бо такя ба манбаъаш менависад, ки мактаби мазкур дар ноҳияи Спитамени вилояти Суғд барои 604 донишомӯз аз ҷониби давлати Узбекистон сохта ба истифода дода шудааст. Созишнома дар бораи сохтмони он моҳи марти соли 2018 зимни сафари давлатии президенти Узбекистон Шавкат Мирзиёев ба Тоҷикистон ба имзо расида буд.
Аммо дар хусуси таърихи баргузории ин маросим то ҳол рӯзи муайян гуфта нашудааст, вале омадааст, ки таърихи маросим тариқи воситаҳои дипломатӣ муайян карда мешавад.
Дар баробари сохтани мактаб, инчунин Узбекистон беморхона барои қабули 200 нафар дар ноҳияи Қубодиёни вилояти Хатлон низ сохтанист.
Гуфта мешавад, ки барои беҳбуд бахшидани муносибатҳои дуҷониба Тоҷикистон низ дар шаҳри Самарқанд барои 640 талаба сохтани мактаберо дар назар дорад. Ҳамчунин Тоҷикистон ният дорад, ки дар ноҳияи Риштони вилояти Фарғона як муассисаи томактабӣ низ бисозад.
Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.