Муҳоҷирони корӣ дар Русия пеш аз гирифтани иҷозати корӣ (патент) бояд барои маълум кардани сатҳи донистани забони русӣ имтиҳони шифоҳӣ супоранд.
Дар ин бора имрӯз, 18-уми сентябр Вазорати маориф ва таҳсилоти олии Федератсияи Русия зимни посух ба талаби вакили Думаи давлатӣ Сардана Авксентева аз ҳизби “Одамони нав” (Новые люди) хабар додааст.
Чанде пеш ин вакили рус аз Вазорати маорифи кишвараш талаб карда буд, ки русидонии муҳоҷирон аз тариқи имтиҳони шифоҳӣ санҷида шавад.
“Вазорати маориф ва илми Русия пешниҳодҳои шуморо дар бораи такмил намудани имтиҳони забони русӣ барои муҳоҷирони корӣ ба тарзи шифоҳӣ дастгирӣ мекунад. Барои татбиқи ин пешниҳодҳо зарур аст, ки ба низомномаи баргузории имтиҳон тағйирот ворид карда шавад“, омадааст дар посухи Вазорат.
Дар ҳамин ҳол муовини вазири маорифи Федератсияи Русия Константин Могилевский таъкид карда, ки ҷорӣ намудани имтиҳони шифоҳӣ барои дақиқтар санҷидани донистани забони русӣ барои кор кумак хоҳад кард.
Ҳоло муҳоҷирон барои дарёфти иҷозати корӣ, имтиҳонро аз тариқи хаттӣ месупоранд. Дар ҳоли ҳозир имтиҳони шифоҳӣ танҳо ҳангоми гирифтани иҷозатномаи истиқомат шарт аст. Илова бар ин, Вазорати маорифи ин кишвар пешниҳод кардааст, ки 20% муҳтавои имтиҳонҳо нав карда шуда, нархҳои ягона барои имтиҳонҳо дар саросари кишвар муқаррар карда мешаванд.
