Гурӯҳе аз муҳоҷирони тоҷик аз он шикоят доранд, ки марзбонони Русия онҳоро намегузоранд вориди ин кишвар бишаванд.
Ба дасти Azda tv наворҳое расид, ки гурӯҳи зиёде аз муҳоҷирони тоҷик мегӯянд, аз Тоҷикистон бо мошин ба Русия сафар кардаанд ва чанд рӯз аст, ки дар марз бо Русия банд мондаанд ва танҳо ба шаҳрвандони Тоҷикистон иҷозати вуруд ба хоки Русия дода намешавад.
Марзбонони рус ба муҳоҷирон гуфтаанд, барои шаҳрвандони Тоҷикистон фақат аз 14-сола поён ва аз 60-сола боло барои ворид шудан ба Русия иҷозат ҳаст, барои боқии тоҷикистониён иҷозат нест.
Дар яке аз сабтҳо гуфта мешавад: “Бародароне, ки аз Тоҷикистон ба Русия омаданӣ ҳастед, агар шаҳрвандии Русияро надошта бошед, шуморо ворид шудан намегузоранд, ҳама марзҳоро аз ҳамин рӯз то 15-уми инюни соли ҷорӣ бастаанд. Метавонед, ки наояд, на бо ҳавопаймо ва на бо мошини майда. Худи ҳамин рӯз тамоми бачоҳоро гардонданд.“
Ба гуфтаи муҳоҷирони бандмонда, марзбонони Русия танҳо шаҳрвнадони Тоҷикистонро намегузоранд вориди ин кишвар шаванд, аммо барои шаҳрвандони Узбекистону Қирғизистон ва ғайра ин мушкилот вуҷуд надорад.
Ҳамзамон дар навори дигаре дида мешавад, ки ҳудуди 200 мошини майдаву калон ва одамони зиёде дар канори ҷода мунтазиранд, ки тақдири онҳо чӣ мешавад. Дар он навор зикр мегардад, ки муҳоҷирон дар марзи Қазоқистону Русия аз рӯзи 22-уми апрел қарор доранд, вале то ҳол ба онҳо иҷозати вуруд дода намешавад. Ҳамзамон гуфта мешавад, ки марзбонони Русия ба онҳо гуфтаанд, ки “система кор намекунад”, вале барои шаҳрвандони дигар кишварҳо чунин чизе гуфта нашудааст.
То ҳол дар бораи дармондани муҳоҷирони тоҷик дар марзи Русия мақомоти ин кишвар маълумоти расмие пешниҳод накардааст. Ва ҳамзамон на сафорати Тоҷикистон ва на мақомоти дахлдори кишвар ба ин қазия вокунише накадаанд.
Маълум нест, ин гуна бархурд бо муҳоҷирони тоҷикистонӣ тасмими мақомоти болоии Русия аст ва ё иқдоми марзбонон. Вале ба гуфтаи аксари муҳоҷирони тоҷикистонии муқими Русия, пас аз ҳамлаи хунини “Крокус Сити” вазъи онҳо хеле нигаронкунанда аст. Бархурди мақомот ва ҳатто мардуми оддӣ нисбати шаҳрвандони Тоҷикистон тағйир кардааст.
