Сарони Тоҷикистон ва Бонки Осиёии рушд пас аз баррасии равобит ва масоили муштарак дар бораи ҳамкориҳои ояндаи дуҷониб дар шаҳри Душанбе гуфтугӯ карданд.
Бино ба иттилои расмӣ, 12-уми июни соли 2023 Президенти Бонки Осиёии рушд ҷаноби Масатсугу Асакава бо Раисҷумҳури Тоҷикистон Эмомалӣ Раҳмон дидор кард.
Гуфта мешавад, Масатсугу Асакава дар рафти нишаст аз имкониятҳои Тоҷикистон “дар истеҳсолу содироти энергияи тозаю барқароршаванда” ва рушди “иқтисоди сабз” ёдовар шуда, “ҷонибдории Бонки Осиёии рушдро роҷеъ ба дастгирии саҳми Тоҷикистон дар рӯзномаи глобалии тағйирёбии иқлим тасдиқ намудааст.”
Ба қавли манбаъ, дар рафти ин “мулоқот вобаста ба масъалаи ҳамкории ҷонибҳо ҷиҳати идомаи татбиқи ислоҳот ва дигаргунсозии иқтисодӣ табодули андеша сурат гирифт. Инчунин рушди соҳаи энергетика ва масъалаҳои тағйирёбии иқлим аз ҷумлаи самтҳои мубрами ҳамкории Тоҷикистону Бонки Осиёии рушд арзёбӣ гардиданд.“
Гуфта мешавад, аз ҷониби Бонки Осиёии рушд давоми 25 сол дар 180 лоиҳа дар соҳаҳои мухталифи Тоҷикистон ба маблағи зиёда аз 2,5 миллиард доллари америкоӣ маблағгузорӣ шудааст.
