Баррасии омодагӣ ба ҳамоиши солгарди Созмони Ҳамкориҳои Шанхай

Муовини аввали вазири умури хориҷаи Тоҷикистон Хусрав Нозирӣ бо сафири Ҷумҳурии Мардумии Чин дар Тоҷикистон Лю Бинг мулоқот кард.

Хабаргузории "Азия Плюс" бо такя ба манбааш дар вазорати умури хориҷаи Тоҷикистон навишт, ки дар ин дидор муносиботи дуҷониба мавриди баррасӣ қарор гирифтанд.

Онхо дар ин дидор ҳамчунин дар бораи омодагӣ ба ҳамоиши солгарди СҲШ, ки дар Душанбе баргузор мегардад табодули назар карданд.

Саммити солгарди СҲШ дар Душанбе рӯзҳои 16-17 сентябри 2021 дар Душанбе баргузор мегардад, ки Созмони Ҳамкорихои Шанхай 20-солагии худро таҷлил мекунад.

Саммити Душанбе бо ширкати сарони давлатҳои узви Созмон Чин,Русия, Қазоқистон,Тоҷикистон, Қирғизистон, Узбекистон, Ҳиндустон ва Покистон баргузор мешавад.

Кишварҳои нозир дар ин Созмон Афғонистон, Белорус, Эрон ва Муғулистон, кишварҳои шарик Озарбойҷон, Арманистон, Камбоҷа , Непал, Туркия ва Шри-Ланка мебошанд.

Дар Душанбе ҷиҳати истиқболи меҳмонони олимақом сарони кишварҳои СҲШ даҳ манзили нав сохта мешавад. Онҳо дар минтақаи қароргоҳи ҳукумати Тоҷикистон воқеъ дар хиёбони Рудакии Душанбе сохта мешаванд.

Бар асоси нақшаи мақомот сохтмон бояд то моҳи августи 2021 ба итмом бирасад.

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.