Мақомоти амниятии кишвар нагузоштанд, намоишномаи театрии "Манқурт", ки бо коргардонии шинохтаи тоҷик, Барзу Абдураззақов омода шуда буд, рӯи саҳнаи театр биёяд.
Дар ин бора худи ҳунарманд шоми 19-уми май дар саҳифаи фейсбукаияш хабар додааст. Абдураззоқов мегӯяд, сабаби монеа шудани мақомот ба намоиши "Манқурт"-ро медонад, вале ҷузъиёти онро шарҳ додан намехоҳад.
Гуфта мешавад, ки намоишномаи "Манқурт" аз рӯйи асари "Дуроҳаи бӯронӣ"-и Чингиз Айтматов бо коргардонии Барзу Абдураззоқов бояд шоми имрӯз, 20-уми май дар театри "Падида"-и шаҳри Душанбе намоиш дода мешуд, аммо мақомот ба намоиши он зиддият нишон доданд.
Ин коргардони шинохтаи тоҷик солҳо боз дар дохили Тоҷикистон фаъолияти коргардонӣ намекард. Худи ӯ чанде пеш дар суҳбате гуфта буд, ки 12 сол боз дар Тоҷикистон намоиш надодааст. Сабабашро дар даъват нашудан аз ҷониби Вазорати фарҳанг арзёбӣ карда буд.
"Дирӯз аз як театри хеле дур - аз ҷиҳати ҷуғрофӣ як кас телефон карду гуфт, ки мо мехоҳем Шумо дар театри мо намоиш кунед... Ду рӯз пеш як театри дигар. Хонаи ман дар Рӯдакӣ 35 аст, Вазорати фарҳанг Рӯдакӣ 34. Ман 12 сол аст дар Тоҷикистон намоиш надодаам. 12 сол аст, ки қазоқу қирғизу турку узбеку дигарон муҳтоҷи кори мананд, аммо инҷо не.", мегӯяд Барзу Абдураззоқов.
Баъзе коршиносон бар ин назаранд, ки ин ҳунарманди чирадасти тоҷик бештар ба хотири ошкоргӯиҳо ва интиқодҳои бамавридаш аз доираҳои расмӣ дур карда шудааст. Ба гуфтаи онҳо, мақомоти кишвар ба шаҳрвандон на аз рӯи ҳунару маҳорати касбии онҳо, балки ба мавқеи шаҳрванадӣ ва сиёсии онҳо назар мекунаду баҳо медиҳад.
