Вазорати корҳои дохилии Русия дар соли 2025 зиёда аз 2,3 ҳазор иқомаи муваққатӣ (РВП) ва иқомаи доимӣ (ВНЖ)-и шаҳрвандони хориҷиро бекор кардааст.
Намояндаи ВКД-и Русия Ирина Волк хабар дод, ки ин ниҳод аз аввали сол 765 РВП ва 1545 ВНЖ-ро бекор карданд, ки бар асоси издивоҷ бо шаҳрвандони Русия ба муҳоҷирон дода шуда буданд.
Ба гуфтаи ӯ, дар аксари ҳолатҳо чунин издивоҷҳо баъд аз гирифтани мақоми муҳоҷиратӣ бекор карда мешуданд.
Ин ҳам дар ҳолест, ки дар соли 2024 ҳамагӣ 200 иқомаи муҳоҷирон бекор гардидааст.
Иқомаи муваққатӣ (РВП) дар Русия ба муҳоҷирон тариқи квота, ки ҳар сол аз ҷониби ҳукумат муқаррар мегардад, дода мешавад. Инчунин роҳҳои дигаре барои дарёфти РВП низ вуҷуд дорад, мисли довталаб агар дар ҳудуди РСФСР таваллуд шуда бошад, падару модараш шаҳрванди Русияро дошта бошанд, инчунин зиёда аз се сол дар издивоҷ бо шаҳрванди Русия бошад, ё фарзанди умумӣ дошта бошад.
Иқомаи доимӣ (ВНЖ) одатан пас аз як соли иқомат бо РВП дода мешавад, вале баъзе гурӯҳи хориҷиён, мисли мутахассисони баландихтисос, соҳибони забони русӣ ва шахсоне, ки паноҳандагӣ дар Русия гирифтаанд, метавонанд бевосита онро дархост кунанд.
Ва муҳоҷирон ба хотири маҳдуд будани шумораи квотаҳо бо шаҳрвандони Русия бар ивази маблағ ё шарту шароити муайяне издивоҷҳои сохта мебастанд, то иқомаи муваққатиро дарёфт кунанд ва пас аз дарёфти он издивоҷашонро бекор мекарданд.
Вале тағйирот ба қонунгузорӣ аз 25 январи соли 2025 ин кори муҳоҷиронро мушкилтар кард.
Мувофиқи қоидаҳои нав, барои гирифтани РВП бе ҳисоб кардани квота танҳо далели издивоҷ бо шаҳрванди Русия кофӣ набуда, ҳоло лозим аст, ки издивоҷ на камтар аз се сол идома кунад ва ё фарзанди умумӣ, ки дар ин издивоҷ таваллуд ё қабул шудааст, вуҷуд дошта бошад.
