Дувоздаҳ созмони байналмилалии ҳомии ҳуқуқ аз мақомоти Тоҷикистон озодии фаврии маҳбуси сиёсӣ Бузургмеҳр Ёровро, ки даҳ сол боз дар зиндон қарор дорад, талаб карданд.
Дар баёнияе, ки 29-уми сентябр нашр шуд ва Amnesty International, Human Rights Watch, Freedom Now, CIVICUS ва чанд созмони дигар зери он имзо гузоштаанд, гуфта мешавад, ҳуқуқшинос Бузургмеҳр Ёрови 54-сола пас аз эълони дифоъ аз 14 узви баландпояи Ҳизби наҳзати исломии Тоҷикистон дар соли 2015 боздошт шуд.
Додгоҳ ӯро соли 2016 бо иттиҳомоти сохтаи “қаллобӣ”, “сохтакорӣ” ва “таҳқири намояндаи ҳокимият” ба 28 соли зиндон маҳкум кард.
Гуфта мешавад, ин ҳуқуқдони шинохта борҳо дар зиндон ҳуқуқаш поймол шудаву дар ҳуҷраи ҷаримавӣ нигаҳдорӣ шуда, шиканҷа шудааст.
Бо вуҷуди кӯтоҳ кардани муҳлаташ дар авф, мақомот бар зидди ӯ боз чандин айби нав эълон карданд ва ӯ то соли 2043 дар зиндон хоҳад монд.
Ин 12 созмон аз мақомоти Тоҷикистон талаб кардаанд, ки Ёров ва ҳамаи маҳбусони сиёсиро фавран ва бе қайду шарт озод карда, ба боздоштҳои худсарона ва шиканҷа хотима диҳанд ва уҳдадориҳои байналмилалиро барои таъмини озодии ҳуқуқи инсон иҷро кунанд.
Ҳамчунин онҳо аз шарикони байналмилалии Тоҷикистон даъват карданд, ки бо роҳҳои дипломатии дуҷониба ва бисёрҷониба барои озодии Ёров ва дигар маҳбусони сиёсӣ талош варзанд.
Пештар СММ боздошти Бузургмеҳр Ёров, Зайд Саидов, Мақсуд Иброҳимов ва чанд тан аз раҳбарони зиндонии ҲНИТ-ро худсарона номида, озодии фавриашонро талаб карда буд.
