Ҷумҳурии мардумии Чин дар 10 соли ахир беш аз 2,6 миллиард доллар ба иқтисоди Тоҷикистон сармоягузорӣ кардааст.
Дар ин бора рӯзи 2-уми декабр муовини якуми Раиси Кумитаи давлатии сармоягузорӣ ва идораи амволи давлатӣ Фаррух Юсуфзода зимни нишасте бо соҳибкорони чинӣ баён кард.
Юсуфзода дар нишасте бо унвони “Дурнамои сармоягузории соҳибкорони Чин ба Ҷумҳурии Тоҷикистон”, ки дар шаҳри Душанбе бо ҳузури намояндагони ширкатҳои сармоягузорӣ ва саноатии Чин баргузор гардид, гуфт, ки аз ин маблағҳои сармоягузоришуда 57 дарсади онро сармоягузории мустақим ташкил медиҳад.
Ин мақомдори тоҷик таъкид карда, ки Тоҷикистон барои беҳбуди фазои сармоягузорӣ ва соддагардонии расмиёти маъмурӣ шароити хуб омода кардааст. Ӯ мегӯяд: “Қонун дар бораи сармоягузорӣ ба сармоягузорони хориҷӣ кафолатҳои ҳуқуқӣ, аз ҷумла ҳуқуқи интиқоли даромад бо асъори хориҷӣ ба хориҷи кишвар ва анҷом додани дигар амалиёти асъориро фароҳам меорад.”
Юсуфзода инчунин тавлиди барқи Тоҷикистонро барои чиниҳо ҳамчун “энержии сабз” муаррифӣ карда, афзуда, ки “Моҳи июли соли 2024 дар ҳамоиши сармоягузории Тоҷикистону Чин дар Душанбе дар бахшҳои саноат, нақлиёт ва сохтмон ба маблағи 536 миллион доллар созишномаҳо ба имзо расида буданд.”
Ба таҳлили коршиносон, Тоҷикистон фазои сармоягузориро шояд барои соҳибкорони чинӣ то андозае осонтар карда бошад, вале дар асл соҳибкорони дохилӣ аз шароити бади соҳибкорӣ, андозу тафтишоти зиёд ва аз вуҷуди ришваву фасод шикоят доранд. Бархе ҳатто талош доранд сармояҳои худро ба ҳар роҳе, ки бошад аз Тоҷикистон берун кунанд.
