Бештари муҳоҷирони ихроҷшуда аз Русия шаҳрвандони кишварҳои Осиёи Марказӣ будаанд

Бино ба иттилои Хадамоти матбуотии Саридораи амнияти минтақавии Маскав, аз 1 март то 31 декабри соли гузашта кормандони Хадамоти федералии иҷроияи Федератсияи Русия дар вилояти Маскав ва Сарраёсати ВКД аз ин кишвар 404 муҳоҷирро ихроҷ кардаанд.

Гуфта мешавад, ки зиёда аз 80 дарсад қарорҳои судҳои вилояти Маскав дар бораи ихроҷи муҳоҷирон иҷро шудааст.

Ҳамчунин зикр гардида, ки аксари хориҷиёни ихроҷшуда муҳоҷирони корӣ аз кишварҳои Осиёи Марказӣ буда, 8 дарсади онҳо шаҳрвандони Тоҷикистон ва 81 дарсад муҳоҷирон аз Узбекистон будаанд.

Бино ба иттилои расонҳо айни ҳол нисбати муҳоҷироне, ки беасос ва бидуни асноди лозимӣ дар Русия кору зиндагӣ доштанд ё ҳуқуқвайронкунии маъмурӣ доранд, ҳукми ихроҷашон татбиқ мешавад.

Зикр мегардад, ки 36 шаҳрванди хориҷӣ дар боздоштгоҳҳои муваққатӣ қарор доранд ва мунтазири парвоз ба ватанашон ҳастанд.

Ихроҷи муҳоҷирон аз Русия дар ҳолест, ки Президенти Русия Валидимир Путин муҳоҷиронро дар замони каронавирус аз патент ва сабти ном озод намуда буд, вале дар баробари ин дида мешавад, ки муҳоҷиронро ба ҳар баҳона аз Русия ихроҷ мекунанд.

Аз руйи маълумоти интишоргардида, гуфта мешавад, дар 11 моҳи соли 2020 муҳоҷирони меҳнатӣ ба буҷаи минтақаҳои Русия 577,6 миллион доллар даромад ворид карданд, дар ҳоле ки дар соли 2019 ин маблағ 757 миллион долларро дар бар мегирифт.

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.