Ҷумъабой Раҷабзода, блогери тоҷике, ки соли гузашта аз ҷониби мақомоти Русия боздошт ва зиндонӣ шуда буд, 20-уми феврал аз боздоштгоҳ озод шуд.
Ҷумъабой Раҷабзода, ки бо номи Салмон шинохта мешавад, рӯзи 24-уми феврал дар саҳифаи “Инстаграм”-и худ дар наворе гуфтааст, муфаттишони рус нисбаташ “ягон айб наёфтанд ва парвандаро қатъ карданд”.
Ин блогери тоҷик моҳи январи соли 2024 бо иттиҳоми “барангехтани кинаву адовати миллӣ ва паст задани шаъну шараф” дастгир шуда буд. Кумитаи тафтишоти Русия он вақт гуфта буд, ки ӯ дар наворҳои худ “шаъну шарафи духтарони дорои чеҳраи славяниро паст мезад”. Аммо худи Раҷабзода ин иттиҳомро рад карда, гуфта буд, “садо ба ӯ тааллуқ надорад ва дар давоми кори худ ба касе бадӣ ё ба ангехтани бадбинии миллӣ даъват накардааст”.
Ӯ мегӯяд, тамоми муддате, ки дар боздошт буд, барои исботи бегуноҳияш талош кард ва аз қавонини Русия аз тариқи китобҳо ва вакилон ошно шуд. Вай афзуд, бо вакилон ҳамкории хубе дошт ва ҳоло бар зидди мақомоти Русия шикоят навиштааст.
Дастгир шудани ин блогери тоҷик соли гузашта дар расонаҳои русӣ сарусадои зиёдро ба вуҷуд оварда буд. Ҳангоми баррасии қазияи ӯ мақомоти ин кишвар ҳамеша ба зодаи Тоҷикистон буданаш ишора мекарданд. Аммо аз озод шудан ва қатъи парвандааш ба далели бегуноҳӣ расонаҳои Русия то ҳол иттилое нашр накардаанд.
Гуфта мешавад, Раҷабзода шаҳрвандии Тоҷикистон ва Русияро дошт, аммо баъди ба озодӣ баромадан мақомоти Русия шаҳрвандии русии ӯро бекор кардаанд. Аммо ӯ мегӯяд, бегуноҳ аст ва бояд шаҳрвандиаш барқарор шавад.
Бархе таҳлилгарон бар ин назаранд, ки аксар масъулин ва мақомдорони Русия гароиши нажодпарастӣ доранд ва дар маҳкум кардани муҳоҷирон ё иҷрои ҳукм болои онҳо адолатро риоят намекунанд.
Ёдовар мешавем, ки Кароматулло Ҷабборов ва Руслан Бобиев ду блогери дигари тоҷик низ ба хотири мазмуни муҳтавоҳояшон – аввалӣ ба 2 солу чаҳор моҳ ва дуюмӣ ба 10 моҳи зиндон маҳкум шудаанд. Коршиносони байналмилалӣ мегӯянд, озодии баён дар Русия ба шиддат маҳдуд аст. Ҳарчанд Сарқонуни ин кишвар расман аз озодии баён ҳимоят кардааст, вале дар амал мақомоти ин кишвар шароити сахтеро пеш гирифтаанд, ки амалан озодии баён вуҷуд надорад.
