Додгоҳи Хабаровск як тоҷикро барои ҷонибдорӣ аз як созмони байналмилалии террористӣ ба зиндони ислоҳии низомаш сахт маҳкум кард. Дар ин бора Хадамоти матбуоти ФСБ – и Русия дар қаламрави Хабаровск хабар дод.
“Додгоҳи якуми Округи ҳарбии шарқӣ сокини 22-солаи шаҳри Хабаровск, шаҳрванди Тоҷикистон, Хоҷамқулов Н.А-ро дар дастгирии молии ташкилоти байналмилалии террористии “Ҷебҳат ан-Нусра”, ки дар қаламрави Федератсияи Русия мамнуъ мебошад, муттаҳам дониста ба ҳашт соли зиндон маҳкум кард “, – омадааст дар изҳорот.
Дар идома гуфта шудааст, ки Хоҷамқулов барои хариди силоҳ, таҷҳизот ва дигар ниёзҳо ба як узви ин созмони террористӣ маблағ равон кардааст.
Гуфта мешавад, тибқи қисми 1.1 моддаи 205.1 (“Мусоидат дар фаъолияти террористӣ”) Кодекси ҷиноятии Федератсияи Русия парвандаи ҷиноятӣ оғоз шуда буд.
Аммо назари худи маҳкумшуда ва ё вакили дифоу наздиконаш дар мавриди иттиҳом ва ҳукми зиндон дастрас нест. Ва низ гуфта нашудааст, ки ин шаҳрванд аз кадом минтақаҳои Тоҷикистон мебошад.
