Болоравии нархи сӯзишворӣ дар Тоҷикистон

Нархи ҳама намуди сӯзишворӣ тайи якуним моҳи ахир дар Тоҷикистон боло рафтааст. Гарон шудани нархҳо аз охири моҳи май мушоҳида мешавад.

Бино бар иттилои Avesta, дар ҳоли ҳозир, дар шаҳри Душанбе арзиши бензини АИ-92 ба 9,50 сомонӣ, нархи миёнаи сӯзишвории дизелӣ ба 9,20 сомонӣ ва нархи як литр гази моеъ ба 5,60 сомонӣ баробар аст.

Ин нишондиҳандаҳо дар минтақаҳои гуногуни ҷумҳурӣ бо назардошти дурӣ ва хароҷоти нақлиёт фарқ мекунанд. Аз ҷумла, дар атрофи шаҳрҳои Душанбе нархи гази моеъ барои як литр 6 сомонӣ арзиш дорад. Бо вуҷуди болоравии нархҳо, дар кишвар камбуди сӯзишворӣ аз ҷумла гази моеъ вуҷуд надорад.

Ёдовар мешавем, ки ин бори аввал нест, ки нархи сӯзишворӣ дар Тоҷикистон аз аввали соли ҷорӣ боло меравад. Аз ҷумла, дар нимаи моҳи феврал арзиши гази моеъ дар Тоҷикистон боло рафт ва афзоиш он аз аввали сол 14% -ро ташкил дод. Он замон нархи як литр гази моеъ ба 4,55 сомонӣ баробар шуда буд.

Ҳамчунин ҷаҳиши баланди нархи ин навъи сӯзишворӣ моҳи июли соли гузашта ба қайд гирифта шуда буд, ки 65%-ро ташкил медод. Моҳи июли соли 2020 арзиши гази моеъ аз 2,5 сомонӣ то 3,8-4 сомонӣ барои як литр боло рафт.

Агар мо нархи гази моеъро дар моҳи июли соли 2020 бо моҳи июли соли ҷорӣ муқоиса кунем, пас афзоиш ба ҳисоби фоизӣ 65% -ро ташкил медиҳад.

Ширкати Фароз, ки яке аз таъминкунандаҳои асосии маҳсулоти нафтӣ дар Тоҷикистон дониста мешавад, тибқи бархе гузоришҳо маводҳои нафтиро ба таври қочокӣ ба кишвари сеюм-Афғонистон интиқол медиҳад.

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.