Боздиди намояндаҳои Вазорати хориҷаи Афғонистон аз Консулгарии ин кишвар дар Вилояти Мухтори Кӯҳистони Бадахшони Тоҷикистон хабарсоз шудааст.
Шанбеи 25-уми марти соли 2023, сухангӯи Вазорати хориҷаи ҳукумати сарпарасти Афғонистон бо раҳбарии Толибон эълон кард, ки як ҳайъате аз ин вазорат бо раҳбарии мудири идорӣ ва молӣ мавлавӣ Муҳаммадмӯсо Амирӣ аз Консулгарии Афғонистон дар шаҳри Хоруғ, маркази маъмурии Вилояти Мухтори Кӯҳистони Бадахшони Тоҷикистон дидан кардааст.
Дар вокуниш ба ин хабар Зоҳири Ағбар, сафири Афғонистон дар Тоҷикистон ба расонаҳо гуфт, иттилои Вазорати хориҷаи Толибон асос надорад, аммо бархе чеҳраҳои наздик ба нерӯҳои Ҷабҳаи муқовимати миллии Афғонистон гуфтанд, ки ба назар мерасад, акнун Тоҷикистон ҳам аз онҳо пушт холӣ мекунад.
Гуфта мешавад, Консулгарии Афғонистон дар шаҳри Хоруғ, маркази маъмурии Вилояти Мухтори Кӯҳистони Бадахшони зимистони имсол бар асари резиши барфтӯдаҳо дар қатори чандин хонаҳои мардуми таҳҷоӣ низ осеб дида буд.
Вазорати корҳои хориҷии Толибон ҳам гуфтааст, ҳайати ин вазорат барои бозсозии Консулгарӣ ва муайян кардани ҳамҷми зарарҳо ба шаҳри Хоруғи Тоҷикистон сафар кардааст.
