Кормандони нерӯҳои марзбонии Лаҳистон (Полша) дар шаҳри Варшава ва гирду атрофи он 17 нафарро бо иттиҳоми вайрон кардани қоидаҳои будубоши ин кишвар боздошт карданд.
Мақомоти марзбонии Лаҳистон бе овардани номе иттилоъ додааст, ки боздоштшудаҳо шаҳрвандони Тоҷикистон, Русия, Узбекистон, Гурҷистон, Ироқ, Туркманистон, Ветнам ва Ҳиндустон мебошанд.
Бино ба иттилои марзбонӣ, ҳамаи боздоштшудаҳо ҳаққи иқомаи қонунӣ дар Лаҳистонро надошта, 8 нафарашон қарореро, ки онҳоро водор месозад, то ин кишварро тарк кунанд, иҷро накардаанд.
Боқӣ нафарони дигар раводиди беэътибор доштанд ва ё аз мақомоти ин кишвар ба онҳо иҷозати иқомати муваққатӣ дода нашудааст. Гуфта мешавад, дар миёни боздоштшудаҳо нафароне низ ҳастанд, ки ғайриқонунӣ марзро убур карда, аз Олмон ва Литва вориди Лаҳистон шудаанд.
Инчунин як шаҳрвандии Гурҷистон бо ҳуҷҷатҳои қалбакӣ ва ду шаҳрванди Ветнам, ки яке дар баробари доштани будубоши ғайриқонунӣ ҷаримаашро пардохт накарда будааст ва дувумӣ барои дағалона рафтор кардан бо корманди Нерӯҳои марзбонӣ боздошт шудаанд.
Мақомоти Лаҳистон нисбати аксари боздоштшудаҳо, барои тарки хоки Лаҳистон қарор қабул карда, ду нафарро ба маркази хориҷиён ва чор нафарри дигарро ба ҳабс гирифтаанд.
Гуфта мешавад, ин бори аввал нест, ки зодагони Тоҷикистон дар Лаҳистон барои вайрон кардани қоидаҳои ин кишвар боздошт мешаванд.
