Дар вилояти Томски Федератсияи Русия раҳбар ва чаҳор узви як гурӯҳро, ки дар минтақаи Сибир ба фурӯши маводи мухаддир машғул будаанд, пулис боздошт кардааст.
Бино ба иттилои расонаҳои маҳаллӣ, кормандони Раёсати мубориза бо гардиши ғайриқонунии маводи мухаддири Вазорати корҳои дохилии Русия дар вилояти Томск ҳангоми гузаронидани амалиёт як зодаи 47-солаи Ҷумҳурии Тоҷикистонро, ки аз ӯ раҳбари гурӯҳи фурӯшандагони маводи мухаддир ном бурда мешавад, боздошт кардаанд.
Кормандони пулис аз мошини ин зодаи Тоҷикистон чанд баста ҳероинро, ки маҷмӯи онҳо 1 кг-ро ташикил додааст, дарёфт кардаанд.
Ҳамчунин чаҳор узви дигари ин гурӯҳ – се шаҳрванди Ҷумҳурии Узбекистон, ки солҳои таваллудашон 1984, 2003 ва 2002 ва як шаҳрванди Тоҷикистон, соли таваллудаш 1982 мебошад, боздошт шудаанд. Тибқи маълумоти пешакӣ, онҳо тавассути “махфигоҳ”-ҳо ба фурӯши чаканаи маводи мухаддир машғул буданд. Пулис зиёда аз онҳо 200 бастаи маводи мухаддирро мусодира ва беш аз 10 “махфигоҳ”-и онҳоро пайдо кардааст.
Гуфта мешавад, боздоштшудаҳо ба ҳабс гирифта шудаанд ва нисбаташон бо иттиҳомҳои сӯиқасд ба ҷиноят, истеҳсол, фурӯш ё интиқоли ғайриқонунии маводи мухаддир парвандаи ҷиноятӣ боз шудааст.
Мақомоти Русия то ҳол номи боздоштшудаҳоро расонаӣ накардааст ва назари худи зодагони кишварҳои Осиёи Марказӣ, ки ду нафарашон аз Тоҷикистон гуфта мешаванд, низ дар ин бора маълум нест.
