Боздошти домоди яке аз раҳбарони мухолифини тоҷик дар Юнон

Як ҷавони 27-солаи шаҳрванди Тоҷикистонро, ки ба узвият дар ДОИШ муттаҳам мешавад, дар шаҳри Триполиси Юнон дастгир кардаанд. Торнамои "thenationalherald", ки ин хабарро нашр кардааст, менависад, ки ин ҷавон шаҳрванди Тоҷикистон буда, бо дархости ҷониби Тоҷикистон тариқи Интерпол дар Пелопоннеси Юнон рӯзи чоршанбе боздошт шудааст. Мақомоти Тоҷикистон ӯро зери пайгарди Интерпол қарор дода будаанд.

Ин торнамо бо истинод ба пулиси ин кишвар менависад, ки ин ҷавони 27-сола падари чаҳор фарзанд аст ва ҳамчун муҳоҷири ғайриқонунӣ соли 2017 вориди хоки Юнон шудааст. Ин шаҳрванд аз давлати Юнон ҳаққи паноҳандагӣ ба даст овардааст ва дар манзиле зиндагӣ мекарда, ки онро як созмони ҷамъиятӣ дар Триполис барои онҳо иҷора мегирифтааст.

Ҷавони тоҷик худро шавҳари хоҳари яке аз раҳбарони мухолифони тоҷик муаррифӣ намуда, аз Юнон ба унвони қурбонии таъқибот ва шиканҷа дар кишвари худ паноҳандагӣ хостааст. Гуфта мешавад, пулиси Юнон бо мақомоти Тоҷикистон тамос гирифтаанд, то дар мавриди парвандаи ӯ тавзеҳот бигиранд.

Ҷустуҷӯи "Аздо тв" маълум кард, ки ин ҷавон шавҳари хоҳари Шарофиддин Гадоев, раҳбари ҳаркати "Ислоҳот ва Рушди Тоҷикистон" будааст. Ҳафизамоҳ Гадоева, хоҳари Шарофиддин Гадоев мегӯяд, иттиҳмоти ҷониби Тоҷикистон асос надорад. Ба гуфтаи ӯ, шавҳарашро ҳанӯз дар Тоҷикистон мақомоти интизомӣ боздошт ва талаб кардаанд то Ҳафизамоҳро талоқ бидиҳад. Вагарна ӯро бо иттиҳоми узвият бо ДОИШ ва "Гурӯҳи 24" равонаи зиндон хоҳанд кард.

Номи Ҳафизамоҳ Гадоева дар соли 2017 расонаӣ шуда буд. Ӯ он замон шикоят карда буд, ки шиносномаашро консулгарии Тоҷикистон дар шаҳри Истанбул гирифта ва бозпас надодаанд.

Шарофиддин Гадоев дар суҳбати телефонӣ ба "Аздо тв" гуфт, хоҳар ва шавҳари хоҳараш барои дарёфти паспорт (травел документ) ба мақомоти пулиси Юнон муроҷиат карданд, баъдан пулиси Юнон номи шавҳари хоҳарашро дар пайгарди Пулиси байналмилал (интерпол) ёфта, ӯро боздошт карданд.

Гадоев мегӯяд, бо додмодашон аз наздик шиносоӣ надорад ва издивоҷи ӯ бо хоҳараш тақрибан солҳои 2016 сурат гирифтааст. Ба ҳамин хотир дар бораи ӯ чизе гуфта наметавонад.

Пештар ҳам як мухолифи дигари тоҷик Кузов Мирзораҳим машҳур бо номи Шонаими Карим бо дархости Тоҷикистон дар пайгарди Интерпол қарор дошт. Ӯ дар Юнон боздошт шуда буд ва дертар додгоҳи Юнон ӯро сафед намуда, раҳояш кард.