Бо фармони Додситонии кулли Туркия 19-уми марти соли ҷорӣ шаҳрдори Истанбул Акрам Имомуғлу ва беш аз 100 мансабдору чеҳраҳои маъруф боздошт шуданд.
Мақомоти додситонӣ Имомуғлу ва дигар боздоштшудаҳоро ба фасод, ташкил ва раҳбарии гурӯҳи ҷиноятӣ, тамаъҷӯӣ, дасткорӣ дар тендерҳо ва қаллобӣ муттаҳам мекунад.
Инчунин додситонӣ Имомуғлуро ба “ҳимоят ва дастгирии ғайримустақим” аз Ҳизби коргарии Курдистон (PKK), ки Туркия онро “созмони террористӣ” мешуморад, айбдор кардааст. Гуфта мешавад, ки ӯ дар сохторҳои шаҳрдорӣ аъзои ин созмонро ба кор гирифтааст.
Ба гуфтаи додситонӣ, Имомоғлу дар чорчӯби ду парвандаи алоҳидаи Раёсати таҳқиқи ҷиноятҳои “террористӣ” ва “ташкилоти ҷиноӣ” боздошт шудааст.
Гуфта мешавад, ҳоло шаҳрдори Истанбул ба муҳлати 4 рӯз боздошт шудааст, агар тафтишот зарур донист боз ҳукми боздошти муваққатияш дароз карда мешавад.
Бино ба иттилои расонаҳо, дар пайи боздошти шаҳрдори Истанбул ҳазорҳо ҷонибдор ва мухолифи ҳукумати феълии Туркия ба хиёбонҳо баромада, озодии ӯро талаб карданд.
Боздошти шаҳрдори Истанбул дар ҳоле сурат мегирад, ки қарор буд чанд рӯз баъд интихоботи пешакӣ дар дохили Ҳизби халқии ҷумҳурӣ (CHP) сурат бигирад. Имамоғлу яке аз номзадҳои асосӣ дар муқобили президенти кунунӣ, Раҷаб Тайиб Эрдуғон, дар интихоботи ояндаи президентии ин кишвар шуморида мешуд.
Мунтақидони ҳукумати Туркия мегӯянд, боздошти Имомуғлу барои саркӯби дигарандешон ва чеҳраҳои наву пурнуфузи сиёсӣ аст, ки ҳизби ҳоким намехоҳад дигарон сари қудрат биёянд.
Раиси Ҳизби халқии ҷумҳурӣ (CHP) Ӯзғур Ӯзел ин боздоштро “кудатои зидди демократия” хонд ва ҳукуматро барои барканор кардани Имомоғлу ва канор задани мухолифон аз саҳнаи сиёсӣ муттаҳам кард.
Аммо мақомоти додситонии Туркия ин иттиҳомро рад карда, гуфтаанд, ки шаҳрдор аз қонун боло нест ва агар бегуноҳ бошад ҳатман озод мешавад ва дар акси ҳол бояд назди қонун ҷавоб бигӯяд. Ва низ боздошти чандин масъули дигарро, аз ҷумла раиси ноҳияи Шишлӣ, муовини ӯ ва раиси Пажӯҳишгоҳи ислоҳот ва чеҳраҳои шинохта, ки баъзе онҳо аъзои ҳизби ҳокиманд, далели мақсаднок набудани ин боздоштҳо мегӯянд.
