Пулиси шаҳри Варшаваи Лаҳистон ду мардеро бо иттиҳоми тирандозӣ дар бозори “Олимпия” боздошт кардаанд.
Бино ба иттилои пулиси Варшава, боздоштшудагон шаҳрвандони хориҷӣ буда, яке аз онҳо шаҳрванди 38-солаи Украина ва дуюмӣ шаҳрванди 45-солаи Тоҷикистон аст. Ҳарду ба муҳлати се моҳ ба ҳабси пешакӣ гирифта шудаанд.
Ҳодисаи тирандозӣ рӯзи 8-уми сентябри соли ҷорӣ рух додааст. Он ҳам замоне буда, ки кормандони пулис кӯшиш кардаанд ҳуҷҷатҳои як мардеро, ки дар фурӯши телефонҳои дуздӣ гумонбар мешуд, тафтиш кунанд. Ҳангоми тафтиш ӯ фирор намудааст, гумонбари дуюм ба сӯи пулис тир кушодааст, ки дар ҷараёни тирандозӣ як марди роҳгузари 57-сола маҷруҳ шудааст.
Гуфта мешавад, ҷустуҷӯи гумонбарон чанд ҳафта давом кардааст. Дар тафтишот кормандони пулиси Варшава ҳамроҳи кормандони шуъбаи мубориза бо терроризми ҷиноӣ ва кушторҳо иштирок карданд ва сабтҳои камераҳои назоратиро пайдо намуда, шоҳидони ҳодисаро пурсуҷӯ кардаанд.
Нисбати боздоштшудаҳо бо иттиҳоми “ҳамла ба кормандони мақомоти ҳифзи ҳуқуқ бо истифода аз силоҳи оташфишон” парванда боз шуда, ба онҳо аз як то даҳ соли зиндон таҳдид мекунад.
Номи шаҳрванди Тоҷикистон ва назари ӯву адвокаташ дар ин бора дастрас нест.
