Дар шаҳри Қазони Русия як шаҳрванди 22-солаи Тоҷикистон бо иттиҳоми маблағгузорӣ ба терроризм боздошт шудааст. Ҳоло ӯ дар боздоштгоҳи муваққатии ин шаҳр қарор дорад.
Акс аз Интернет
Бино ба маълумоти мақомоти тафтишотии шаҳри Қазони Ҷумҳурии Татаристон як ҷавони 22-солаи шаҳрванди Тоҷикистон дар гузаронидани маблағ тариқи бонк ба миқдори 550 рубли русӣ ба ҳисоби гурӯҳҳои террористӣ гумонбар мешавад.
Муфаттишони Кумитаи тафтишотии Тотористон мегӯянд, ин ҷавон гӯё тавассути Сбербанк се маротиба ба маблағи умумии 550 рубли русӣ интиқол додааст. Гуфта мешавад, ки ин пул барои “маблағгузории фаъолияти аъзои созмони террористии ДИИШ” фиристода шудааст.
Аз ин ҷавони тоҷик Кенҷаев С.Х. ном бурда мешавад ва тибқи иттилои расонаҳо, ӯ ҳоло аз ҷониби мақомоти амниятии шаҳри Қазон боздошт шуда, дар боздоштгоҳ рақами 1-и Тотористон қарор дорад.
Тавре расонаҳои русӣ хабар медиҳанд, нисбати Кенҷаев парвандаи ҷиноӣ тибқи моддаи 205.1-и Кодекси ҷиноии Федератсияи Русия (кӯмак ба фаъолияти террористӣ) аз ҷониби Кумитаи тафтишотии Ҷумҳурии Тотористон боз шудааст ва тафтишот идома дорад.
Аммо то ҳол назари худи ин ҷавони тоҷик дастраси расонаҳо нашудааст.
