Дар пайи ҳамлаи паҳподӣ ба шаҳри Киришии вилояти Ленинград, дар яке аз бузургтарин полойишгоҳҳои Русия оташсӯзӣ рух дод. Ҳамзамон, чанд минтақаи ин кишвар фурӯши бензину дизелро маҳдуд кардаанд.
Ба гузориши Reuters, Александр Дрозденко, волии вилояти Ленинград, рӯзи 9-уми ноябр гуфта, ки полойишгоҳи Кириши шабона ҳадафи паҳподи украинӣ қарор гирифтааст. Ба гуфтаи ӯ, оташсӯзӣ маҳор шудааст. Дрозденко ҳамчунин аз марги як зан бар асари афтидани пораҳои паҳпод ба бинои истиқоматӣ дар шаҳри Всеволожск хабар дод. Ин ҳодиса дар маҳалли дигар, берун аз полойишгоҳ рух додааст.
Полойишгоҳи “Киришинефтеоргсинтез”, маъруф ба KINEF, ба ширкати “Сургутнефтегаз” тааллуқ дорад ва иқтидори лоиҳавии коркарди тақрибан 20 миллион тонна нафт дар солро дорад. Euronews аз осеб дидани се воҳиди коркарди нафт хабар додааст. Аммо дар гузоришҳои расмӣ ҳаҷми хисорот ва муҳлати эҳтимолии барқарорсозии фаъолияти ин воҳидҳо оварда нашудааст.
Ҳамла дар шароите сурат гирифт, ки камбуди сӯзишворӣ дубора дар чанд минтақаи Русия гузориш мешавад. Reuters рӯзи 9-уми ноябр бо такя ба мақомот ва расонаҳои русӣ навишт, ки дар ду ҳафтаи гузашта дастикам ҳашт полойишгоҳи бузург ҳадафи ҳамла қарор гирифтаанд.
Дар Карелия фурӯши сӯзишворӣ дар нуқтаҳои канори шоҳроҳҳо барои ҳар харид ба 30 литр бензин ва 50 литр дизел маҳдуд шуда, фурӯш дар зарфҳои сайёр мамнуъ шудааст. Мақомоти минтақа ин чораҳоро муваққатӣ ва барои тақсими баробари захираҳо зарур донистаанд.
Дар гузориши тозатар, Reuters рӯзи 10-уми ноябр аз қавли ду манбаи соҳаи нафт хабар дод, ки ҳамлаҳои аз охири октябр идомаёфта тақрибан 30 дарсади иқтидори коркарди нафти Русияро аз дастрасӣ берун кардаанд. Аммо мақомоти расмӣ чунин омореро ҷое нашр накардаанд.
Тоҷикистон, ки воридоти сӯзишвориаш асосан аз Русия аст, ин ҳамлаҳо ба бозори сӯзишвории Тоҷикистон аллакай таъсири худро расондааст. Агарчи мақомоти Тоҷикистон гаронии нархи сӯзишворӣ дар кишварро аз таъсири ҷанг намегӯянд, вале қаблан вазъи бозори ҷаҳонӣ, маҳдудиятҳои содиротии кишварҳои истеҳсолкунанда ва афзоиши хароҷоти интиқолро аз сабабҳои гаронӣ номида буданд.
