Вазири корҳои дохилии Русия зимни нишасте дар Душанбе гуфт, ки дар давоми 8 моҳи гузашта 400 касро бо дархости мақомоти тоҷик боздошт ва ба Душанбе истирдод шудаанд.
22-уми сентябри соли 2025 дар Душанбе ҷаласаи навбатии Мушовараи якҷояи Вазоратҳои корҳои дохилии Тоҷикистон ва Федератсияи Русия баргузор шуд. Дар кори он вазири корҳои дохилии Тоҷикистон Раҳимзода Рамазон Ҳамро ва вазири корҳои дохилии Русия Владимир Колоколсев иштирок карданд.
Ҷонибҳо масъалаҳои ҳамкорӣ дар самти мубориза бо ҷиноятҳои фаромиллӣ, мубодилаи иттилоот тавассути низомҳои электронӣ ва роҳҳои баланд бардоштани сифати тафтишотро мавриди муҳокима қарор доданд. Таъкид шуд, ки дар шароити рушди босуръати технологияҳои рақамӣ мубориза бо ҷиноятҳои киберӣ аҳамияти хосса касб мекунад.
Гуфта мешавад, дар поёни ҷаласа нақшаи ҳамкорӣ барои соли 2026 тасдиқ ва зарурати таҳкими чораҳои муштарак дар мубориза бо ҷинояткорӣ таъкид гардид. Ҳар ду ҷониб изҳори қаноатмандӣ намуданд, ки ҳамкориҳои ВКД Тоҷикистону Русия барои таъмини амният ва тартиботи ҷамъиятӣ нақши муҳиме доранд.
Ба иттилои Вазорати корҳои дохилии Русия, танҳо дар ҳашт моҳи гузашта бо дархости мақомоти Тоҷикистон 400 нафар, ки дар ҷустуҷӯ қарор доштанд, дастгир ва ба Тоҷикистон истирдод шуданд.
Коршиносон хотиррасон мекунанд, ки ҳамкориҳои амниятӣ миёни ду кишвар танҳо ба мубориза бо ҷиноятҳои муқаррарӣ маҳдуд намешавад. Ба гуфтаи онҳо, Русия дар солҳои охир дар боздошт ва истирдоди чандин мухолифи сиёсии тоҷик нақши калидӣ бозида, онҳоро ба мақомоти Тоҷикистон таслим намудааст.
Шахсиятҳои сиёсии зиёде, ба монанди Маҳмадрӯзӣ Искандаров, осбиқ раиси Ҳизби демократи Тоҷикистон, Ёқуб Салимов, собиқ вазири ВКД, Изат Амон, ҳомии ҳуқуқи муҳоҷирон ва фаъоли ҷомеаи шаҳрвандӣ ва чанде аз аъзои ҲНИТ, фаъолони Бадахшон, ба монанди Амриддин Аловатов, Оразу Рамзӣ Вазирбековҳо ва дигарон дар давоми солҳои гузашта аз Русия боздошт ва ба Тоҷикистон истирдод шудаанд.
