Боздошту таъқиби муҳоҷироне, ки дар гиридҳамоии рӯзи ҷумъа ширкат карданд

Дар Маскав даҳҳо муҳоҷири тоҷикро, ки дар назди сафорати Тоҷикистон бо талаби озодии Иззат Амон, ҳомии ҳуқуқи муҳоҷирон бо нишони эътироз ҷамъ омада буданд, пулис боздошт кард. Дар ин бора ОВД-инфо хабар дод.

Бино ба иттилои ОВД-Инфо дар назди сафорат тақрибан 15 автобуси пулис ҳузур дошт ва муҳоҷиронро ба онҳо бор мекарданд. Дар ҳоли ҳозир шумораи дақиқи нафароне, ки боздошт шуда буданд маълум нест.

Гуфта мешавад нафароне, ки аз назди сафорат боздошт шудаанд, ҳадди ақал дар 9 шӯъбаи пулиси шаҳри Маскав нигоҳ дошта шудаанд.

Бино ба иттилои “ОВД-инфо”:

ОВД "Марьина Роща" - 13 боздоштшуда

ОВД "Головинский" - 15 боздоштшуда

ОВД "Левобережный" - 15 боздоштшуда

ОВД "Ломоносовский" - 18 боздоштшуда

ОВД "Нагорный" - 13 боздоштшуда

ОВД "Пресненский" - 1 боздоштшуда.

ОВД "Фили-Давыдково"- 6 боздоштшуда.

ОВД «Царицыно»- 15 боздоштшуда

Дар идораи полиси ноҳияи Можайскийи Маскав - 13 боздоштшуда.

Ба гуфтаи шоҳидон, пулис ҳангоми боздошт эътирозгаронеро, ки шаҳрвандии Русияро доранд озод мекард ва шаҳрвандони Тоҷикистонро ба шӯъбаҳои пулис бурданд.

То имрӯз қисме аз ин муҳоҷирони боздоштшуда озод карда шудаанд, аз қисми дигар то ҳол маълумоте нашр нашудааст ва тақдирашон рӯшан нест.

Дар наворҳое, ки ба "Аздо тв" расид дида мешавад садҳо муҳоҷир рӯзи 2‑уми апрел дар назди сафорати Тоҷикистон бо нишони эътироз барои озодии Иззат Амон дар Маскав ҷамъ омаданд.

Ҳамчунин рӯзи 1-уми апрел даҳҳо нафар аз фаъолони тоҷики муқими Олмон назди сафорати Тоҷикистон бо талаби озодии Иззат Амон бо шиори "Иззати моро озод кунед" гирдиҳамоӣ барпо карданд.

Дар ҳамин ҳол баъзе муҳоҷироне, ки дар гирдиҳамоии шаҳри Маскав ширкат карданду баъд аз боздошт раҳо шуданд, дар тамос бо “Аздо тв” гуфтанд, шуруъ аз рӯзи шанбе маъмурони амниятии Тоҷикистон хонаводаҳояшонро бозпурсӣ доранд.

Як ҷавон, ки нахост номаш зикр шавад гуфт, “падару модарамро боздошт карданд, болои онҳо фишори зиёд оварданд, модарам бемории қанд аст, саломатияш хеле бад шудааст. То маъмурони амниятӣ бо ман суҳбат накарданд ва ман ваъдаи бозгашт ба Тоҷикистонро накардам онҳоро аз боздоштгоҳ раҳо накарданд”.

Инчунин чанд муҳоҷири дигар низ гуфтанд, ки маъмурони амниятӣ ба хонаҳояшон рафтанд ва падару модаронашонро таҳдид кардаанд, ки фарзандатон бояд ҳарчи сареъ ба Тоҷикистон баргардад.

Ёдовар мешавем, ки Иззат Амон як чеҳраи маъруф ва ҳомии ҳуқуқи муҳоҷирон рӯзи 25-уми моҳи март шаҳрвандияш лағв ва рӯзи 27-март дар Тоҷикистон хабари боздошташ расонаӣ шуд.

ВКД-и Тоҷикистон Иззат Амонро ба қаллобӣ муттаҳм намуда, нисбаташ бо моддаи 247, қисми 4-и Кодекси Ҷумҳурии Тоҷикистон парванда боз кардааст.

Аммо наздикони ӯ ва ҷомеаи шарҳрвандӣ ин иттиҳомотро рад мекунанд ва парвандаро дорои ангезаи сиёсӣ унвон кардаанд.

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.