Дар даргирии мусаллаҳонаи шоми 27-уми январ, ки байни марзбонони Тоҷикистону Қирғизистон рух дод, 2 нафар аз шаҳрвандони Тоҷикистон кушта ва 10 нафари дигар захмӣ шуд, айни замон оташбас эълон шудааст.
Бино ба иттилои Нерӯҳои марзбонии Кумитаи давлатии амнияти миллии Тоҷикистон, аз 10 нафари захмишудагон 6 нафарашон низомӣ ва 4 нафари дигарашон мардумӣ оддӣ ҳастанд. Ва ҳамчунин ду нафари кушташуда низ шаҳрвандони ғайринизомӣ будаанд.
“Ҳамчунин 2 нафар шаҳрвандони Ҷумҳурии Тоҷикистон – Туйчиев Обидҷон, соли таваллудаш 1986 сокини ҷамоати деҳоти Хоҷаи Аъло бар асари таркиши тири миномети низомиёни Қирғизистон дар ҳавлии номбурда ва Шарипов Абдулатиф Рафиевич, соли таваллудаш 1964, ронандаи шуъбаи ёрии аввалияи тиббии беморхонаи шаҳри Исфара ҳангоми наҷоти шаҳрвандони мулкии деҳаи Хоҷаи Аъло зимни зарбаи гулӯлаи минамёти ҷониби Қирғизистон ба ҳалокат расиданд.”, омадааст дар изҳороти Нерӯҳои марзбонии КДАМ-и Тоҷикистон.
Нимашаби гузашта мақомоти ду кишвар бо ҳам мулоқот доштанд ва ҷонибҳо ба тавофуқ расиданд, ки фавран оташбас эълон шуда, то соати 08:00 субҳи 28-уми январ нерӯҳои низомӣ ва техникаҳои ҷангӣ аз марз ба маконҳои пешинаашон баргардонида шаванд.
Айни замон вазъ дар марзи Тоҷикистону Қирғизистон муътадил арзёбӣ мешавад. Гуфта мешавад, омилҳои даргирии ин муноқишаи мусаллаҳона аз ҷониби комиссияи муштаракаи сохторҳои дахлдори ҳарду ҷониб мавриди таҳқиқ қарор дорад.
Мақомоти ду кишвар дар даргирии муноқишаи мусаллаҳонаи навбатӣ, ки яке аз сабабҳояш роҳбандӣ гуфта мешавад, ҳамдигарро гунаҳкор медонанд. Пештар мақомоти Қирғизистон ҷониби Тоҷикистонро ба истифодаи гранатомиёт ва миноиёт айбдор карда буд, аммо дар навбати худ мақомти тоҷик дар изҳороти субҳи 28-умаш низ ҷониби Қирғизистонро ба ҳамин айб муттаҳам кард.
