Рӯзи якшанбе, 19-муи октябр артиши Исроил пас аз 9 рӯзи эълони оташбас манотиқи гуногуни Ғаззаро ба шиддат бомборон кард.
Ҳамлаи ҳавоӣ ва мушакии дирӯза ба Ғазза шадидтарин ҳамла пас аз иттифоқи оташбас гуфта мешавад, ки Исроил тамоми гузаргоҳҳоро баст ва воридоти кумакҳои башардӯстонаро манъ кард.
Ба иттилои расонаҳо исроилӣ, артиши ин кишвар ба 120 нуқта дар саросари Ғазза ҳамла кард. Аммо манобеи маҳаллӣ ба расонаҳо гуфтаанд, дар ин ҳамла хаймаҳои оворагон, хайма ва маконҳое, ки рӯзноманигорон кор мекарданд, ба шиддат мавриди ҳадаф қарор гирифтанд, ки дар натиҷа 40 нафар кушта ва даҳҳо нафари дигар захмӣ шуданд.
Пас аз дахолати кишварҳои миёнҷигар ва фишори идораи Трамп болои Натанёҳу, артиши Исроил соати 18:20 ба мақти маҳаллӣ эълон кард, ки ба тавофуқи оташбас баргашт ва аз ҳуҷуми ҳавоӣ бозистод. Инчунин расонаҳои исроилӣ хабар доданд, ки гузаргоҳҳо боз шуда, раванди вуруди кумакҳои башардӯстона ба Ғазза аз сар гирифта шудааст.
Ба иттилои дафтари матбуоти ҳукуматии Ғазза, Исроил пас аз эълони оташбас, ки аз рӯзи 10-уми октябр расман барқарор шудааст, то имрӯз 80 маротиба иттифоқро шикаста ва ҳамлаҳои густардае анҷом дода, ки ин ҳамлаҳо сабаби кушта шудани 97 нафар ва захмӣ шудани 230 кас гардидааст.
Исроил иддао дорад, ки ин ҳамларо ба хотири он аз сар гирифт, ки гурӯҳҳои силоҳбадасти ҲАМОС дар минтақаи ҷануби Рафаҳ ба “Хатти сурх” наздик шуданд ва ду сарбози исроилиро куштанд. Аммо ҲАМОС расман эълон кард, ки минтақаи мазкур пурра зери тасарруфи нерӯҳои исроилӣ қарор дорад ва аз моҳи марти соли ҷорӣ дар ин минтақа ҳеч нерӯе надорад.
ҲАМОС дар баёнияи худ эълон карда, ки нуқтаи даргирӣ ҳамон ҷоест, ки нерӯҳои Ёсир Абушабоб, гурӯҳе, ки аз аҳолии Ғазза аст ва Исирол худаш онҳоро барои ҷангидан бар зидди ҲАМОС мусаллаҳ карда буд, мустақар буданд.
