Ҷеймс Гилмор: Лукашенко дигар имкон надорад раисҷумҳур бимонад
Намояндаи Амрико дар Созмони Амният ва ҳамкории Аврупо, Ҷеймс Гилмор гуфт, “Бояд раисҷумҳури Белорус, Александр Лукашенкоро қонеъ сохт, ки ӯ дигар имкон надорад раисҷумҳур бимонад”.
Ҷеймс Гилмор дар ин бора дар як мусоҳиба бо маҷаллаи амрикоии “Foreign Policy”, ки рӯзи панҷшанбе 3 сентябр нашр шуд, изҳор дошт,
“Чизеро, ки имрӯз мо бояд анҷом бидиҳем ин аст, ки талош кунем Лукашенкоро қонеъ созем, ки дар шароити имрӯза ӯ имкон надорад дигар раисҷумҳур бошад.Лукашенко ҳоло ҳам бар ин бовар аст, ки интихоботҳои дурӯғин ва саркӯби мардум кори хуб аст ва мешавад ҳокимиятро идома бахшид”.
Рӯзи 9 август пас аз эълони натиҷаҳои интихобот дар Белорус ва ғолиб эълон шудани Лукашенко мардуми ин кишвар инро напазируфтанд ва даст ба эътироз заданд. Гуфта мешавад, ки ҳазорҳо эътирозгар дастгир шуда ва ду тан ҳам кушта шуданд.
Дар пайи ин саркӯбиҳои мақомоти Белорус нисбати эътирозгарон давлатҳои ғарбӣ, аз ҷумла давлатҳои назди Балтик зидди Лукашенко таҳрим эълон карданд. Худи Лукашенко давлатҳои Аврупоиро сабабгори ин беназмиҳои кишвараш медонад.
Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.