-3.1 C
Dushanbe

CPJ аз мақомоти тоҷик озодии ду рӯзноманигори зиндониро талаб кард

Кумитаи дифоъ аз рӯзноманигорон (CPJ) аз мақомоти Тоҷикистон талаб кард, ки хабарнигорони зиндонӣ Хушрӯз Ҷумъаев ва Улфатхоним Мамадшоеваро озод кунад.

Рӯзи 13-уми декабри соли ҷорӣ, Кумитаи дифоъ аз рӯзноманигорон бо нашри изҳороте ҳукми хабарнигорони зиндонӣ Хушрӯз Ҷумъаев ва Улфатхоним Мамадшоеваро ваҳшатнок номида, аз мақомоти тоҷик талаб кард, ки таъқиби намояндагони ВАО-ро қатъ намуда, онҳоро барои фаъолияташон зиндонӣ накунанд.

Гулноза Саид ҳамоҳангсози барномаҳои CPJ дар Аврупо ва Осиёи Марказӣ мегӯяд, “тасмими мақомот барои маҳкум кардани Мамадшоеваи 65- сола, ки метавонад умри боқимондаи худро паси панҷара сипарӣ кунад ва ҳамчунин ҳукми Хушрӯз Ҷумъаев даҳшатовар буда, ҳукумати Тоҷикистон барои ин ҳукмҳои сангин далели асосноке пешниҳод накард ва махфӣ будани парвандаи рӯзноманигорон ҳам комилан беасос аст. Мамадшоева ва Чумъаев фавран бояд озод шуда, барои идомаи корашон иҷозат дода шавад.”

Мақомоти Тоҷикистон Хушрӯз Ҷумъаев ва Улфатхоним Мамадшоеваро моҳи майи соли ҷорӣ пас аз ҳодисаҳои хунин дар ин вилоят, боздошт ва дар аввали моҳи ҷорӣ дар мурофиаҳои баста Ҷумъаевро ба 8 сол ва Улфатхоним Мамадшоеваро ба 21 соли  зиндон маҳкум карданд.

Бино ба иттилои расонаҳо мақомот блогнависи ҷавон Хушом Ғуломро дар узвият ба гурӯҳи ҷиноӣ ва Улфатхоним Мамадшоеваро ба 8 моддаи ҷиноӣ, аз ҷумла “даъват ба сарнагунии ҳукумат” гунаҳкор донистаанд. Чун мурофиаҳо пушти дарҳои баста баргузор шудаанд, маълум нест ин хабарнигорон чӣ гуфтаанд ва оё аз болои ҳукм шикоят мебаранд ё не. Аммо Улфатхоним Мамадшоева дар мурофиаҳои гузашта иттиҳомоти нисбаташ эълоншударо рад карда буд.  

Гуфта мешавад, CPJ барои шарҳ ва тасдиқи ҷузъиёти ҳар як парванда ба Додгоҳи Олии Тоҷикистон, Вазорати корҳои дохилӣ ва Додситонии кул нома фиристод, аммо ҳеҷ посухе дарёфт накардааст.

Кумитаи дифоъ аз хабарнигорон дар гузашта низ хостори озодии рӯзноманигори зиндонӣ шуда буд. Аммо мақомот ба ин даъватҳо мисли даъвати дигар созмонҳо то ҳанӯз посухи мусбат надодааст.

Ин ягона созмони ҳуқуқие нест, ки мақомоти тоҷикро барои боздошти рӯзноманигорон, фаъолон ва ҳомиёни ҳуқуқ мавриди танқид қарор медиҳад ва озодии онҳоро талаб мекунад.

Гузоришгари вежаи Созмони Миллали Муттаҳид дар бораи ҳомиёни ҳуқуқ Мери Лоулор, ки бо сафари корӣ ба Тоҷикистон рафта буд, мегӯяд, ки дар мулоқот бо мақомоти Тоҷикистон гуфтааст, ки бояд онҳо дар самти ҳуқуқи башар корҳои мусбат анҷом бидиҳанд, чун обрӯи ин кишвар дар сатҳи ҷаҳонӣ хеле поин рафтааст.

Хабарро таблиғ кунед:

БЕШТАР БИХОНЕД
БЕШТАР БИХОНЕД

Аз Насимҷон Шарифов то ҳол хабаре нест

Бо гузашти се рӯз аз Насимҷон Шарифов, намояндаи Ҳаракати...

Мудири шуъбаи “Қаряи Боло” боздошт шуд

Мудири шуъбаи беморхонаи "Қаряи Боло"-и пойтахт бо иттиҳом даст доштан дар тасарруфи беш аз 70 ҳазор сомонӣ боздошт шудааст.

Як сарбози амрикоӣ дар назди сафорати Исроил худро оташ зад

Рӯзи якшанбе, 25-уми феврали соли ҷорӣ як сарбози нерӯҳои ҳавоии Амрико дар назди сафорати Исроил дар Вашингтон худро оташ зад.

Музокироти пинҳонии Тоҷикистон бо Толибон

Мақомоти Тоҷикистон бо намояндаҳои Толибон ба сурати пинҳонӣ дар шаҳри Душанбе мулоқот кардаанд.