Аз 8-ум то 12-уми октябри соли ҷорӣ ҳаракати нақлиёт дар пойтахти Тоҷикистон муваққатан маҳдуд хоҳад шуд.
Тавре Раёсати корҳои дохилии Душанбе хабар медиҳад, ин чора бо сабаби баргузории як қатор вохӯриҳои сатҳи баланд ва ташрифи меҳмонони хориҷӣ ҷорӣ мегардад.
Мақомот таъкид кардаанд, ки маҳдудият асосан ба хатсайрҳои ҳаракати меҳмонон дахл дорад ва ронандагон ба истифодаи нақлиёти ҷамъиятӣ ташвиқ шудаанд. Ҳамзамон, таваққуфи нақлиёт дар кӯчаҳои протоколӣ низ манъ мешавад. Вақти дақиқ ва рӯйхати кӯчаҳои маҳдудшуда ҳанӯз эълон нашудааст.
Ҳамчунин чанд масҷиди бузурги пойтахт барои шаш рӯз фаъолият нахоҳанд кард. Аз 7-ум то 12-уми октябр намозҳои ҷамоат дар масҷидҳои “Мавлоно Яъқуби Чархӣ”, “Сари Осиё”, “Абӯ Ҳанифа” ва “Ҳоҷӣ Исматулло” баргузор намешаванд. Масҷиди ба номи “Эмом-ал-Бухорӣ” низ аз 8-ум то 12-уми октябр баста хоҳад буд.
Гeфта мешвад? 11 бозору маркази калони савдо дар шаҳри Душанбе низ дар давоми се рӯз 8, 9 ва 10-уми октябр баста хоҳанд буд.
Ин иқдом ҳамзамон бо нишасти сарони кишварҳои ИДМ ва вохӯрии “Осиёи Марказӣ – Русия” дар Душанбе ҳамоҳанг шудааст. Дар рӯзи 9-уми октябр президенти Русия Владимир Путин бо сафари давлатӣ вориди Душанбе мегардад.
Мақомот таъкид мекунанд, ки маҳдудиятҳо барои таъмини амнияти чорабиниҳо ва фароҳам овардани шароити бехатар барои меҳмонони баландпоя андешида шудаанд.
