Рӯзи 23-уми октябри соли ҷорӣ нуздаҳумин нишасти вазирони корҳои хориҷии кишварҳои Осиёи Марказӣ ва Иттиҳоди Аврупо дар Люксембург баргузор шуд.
Бино ба иттилои Вазорати корҳои хориҷии Тоҷикистон, дар ин нишаст ҳамчун намояндаи Тоҷикистон Сироҷиддин Муҳриддин, вазири корҳои хориҷии кишвр иштирок ва суханронӣ кардааст.
Гуфта мешавад, вазирони корҳои хориҷии давлатҳои Осиёи Марказӣ ва Иттиҳоди Аврупо дар нишаст “роҷеъ ба сатҳи кунунӣ ва дурнамои ҳамкориҳои минтақавӣ ибрози назар” карданд.
Дар ин нишаст нақшаи ҳамкориҳои Осиёи Марказӣ ва Иттиҳоди Аврупо қабул гардида, дар он “омодагии кишварҳои Осиёи Марказӣ ва Иттиҳоди Аврупо баҳри вусъати минбаъдаи ҳамкориҳо дар соҳаҳои энергетика, ҳамбастагӣ, рақамикунонӣ, истихроҷ ва коркарди ашёи хом, инчунин амният ва таҳкими сарҳад ва муқовимат ба паёмадҳои тағйироти иқлим дарҷ гардидааст.”
Вазорати корҳои хориҷии кишвар аз ҷузъиёти дигари ин нишаст хабар надодааст. Аммо Шӯрои Иттиҳоди Аврупо дар сомонаи худ баёнияи қабулшудаи ин нишастро, ки аз 19 банд иборат аст, нашр кардааст.
Дар баёнияи вазирони хориҷии Иттиҳоди Аврупо ва Осиёи Марказӣ зикр шуда, ки ҳамаи иштирокдорони нишаст 11 бастаи таҳримҳои Иттиҳодияи Аврупо алайҳи Русияро ҷонибдорӣ намуда ва дар оянда барои ҳамкорӣ дар ин самт ва пешгирӣ аз дур задани таҳримҳо тариқи Осиёи Марказӣ мувофиқат карданд.
Ин дар ҳолест, ки мақомоти Украина соле пеш кишварҳои Осиёи Марказӣ, бахусус Тоҷикистонро ба он муттаҳам карданд, ки Русия аз тариқи ин кишвар маҳсулоти мамнуъаро ворид мекунад.
Дар банди 16-и ин баёния дар робита ба мушкилоти Афғонистон ва хатароти амниятӣ ишора шудааст. Аз ҷумла, таъкид гардида, ки иштирокчиён аз буҳрони шадиди инсонӣ, иқтисодӣ ва ҳуқуқи башар дар Афғонистон изҳори нигаронии амиқ карда, хостори ташкили давлати фарогир, ки шомили ақаллиятҳои миллӣ ва мазҳабӣ бошад, шуданд.
Ҳамчунин дар ин нишаст вазирони хориҷии ОМ ва ИА аз мақомоти Толибон дастрасии комили занону духтарон ба таҳсилоти мутобиқ ба стандартҳои байналмилалӣ ва ширкати онҳо дар ҳаёти ҷамъиятии Афғонистонро дархост карданд.
Ҳамзамон таъкид шуда, ки мақомоти Толибон бояд ҳарчи бештар талош кунанд, то Афғонистон пойгоҳе барои террористон ва маблағгузорӣ ба гурӯҳҳои террористӣ мубаддал нашавад.
