Рӯзи чоршанбе, 11-уми декабр вазири умури муҳоҷирони Толибон Халилураҳмон Ҳаққонӣ дар пайи як ҳамлаи интиҳорӣ кушта шуд.
Ба иттилои расмии мақомоти Афғонистон, ин ҳамлаи интиҳорӣ дар назди Вазорати умури муҳоҷирон дар шаҳри Кобул рух дод, ки ба ҷуз Ҳаққонӣ чанд кушта ва захмии дигар низ ба ҷо гузоштааст.
Забиҳуллоҳ Муҷоҳид, сухангӯи Толибон дар вокуниш ба ин ҳодиса дар шабакаи Х кушта шудани вазири умури муҳоҷирони Афғонистонро таъйид кард. Ӯ дар паёмаш ин амалро иқдоми “буздилона” хонда, афзудааст, ки “ин рӯйдод наметавонад истиҳкоми низоми исломиро дар баробари дасисагарон тазъиф кунад, балки иродаи шуми онҳоро бармало мекунад.”
Оқои Муҷоҳид ин амали террористиро кори дасти ДИИШ дониста, мегӯяд, Ҳаққонӣ “тавассути ҳамон хавориҷе, (манзур ДИИШ аст) ки худро мусалмон мемонманд ва дигар мусалмононро корфир мехонанд, кушта шуд.”
Сомонаи “Аъмоқ”, ки марбут ба гурӯҳи ДИИШ аст, шоми дирӯз бо нашир изҳороте масъулияти ин ҳамларо ба дӯш гирифт. ДИИШ дар изҳороташ, ки ҳамзамон акси ҳавлаварро низ нашр кардааст, навишта, ки “ҳангми хуруҷи Халил Ҳаққонӣ аз бинои вазоратхона ҳамлавар ба ӯ наздик шуда, худро тарконд, ки дар натиҷа худи ӯ ва аҳмроҳонаш кушта шуданд.”
Дар давоми беш аз се соли ҳукуматдории Толибон дар Афғонистон ин бори аввал аст, ки як мақоми аршади ин гурӯҳ бо ин тариқ кушта мешавад.
Гуфта мешавад, шохаи ДИИШ-и Хуросон, ки солҳои ахир дар Афғонистон фаъол шудааст, аксари аъзои онро шаҳрвандони Тоҷикистон ташкил медиҳанд. Онҳо қаблан дар сафи ин гурӯҳ дар Сурия меҷангиданд, аммо пас аз шикасти он дар Сурия ба Афғонистон омадаанд.
