25.9 C
Dushanbe

Дар ноҳияи Рашт модари 66-сола маҳкум ба зиндон шуд

Додгоҳи ноҳияи Лахш 1-уми июни соли ҷорӣ Мавҷигул Ғарибова, сокини ноҳияи Рашт ва модари Ҷунайдуллоҳ ва Фарҳод Худоёровҳоро ба ду соли ҳабси хонагӣ маҳкум кард.

Мавҷигул Ғарибова

Дар ин бора бародарон Ҷунайдулло ва Фарҳод Худоёровҳо дар саҳифаҳои фесбукияшон хабар доданд.

Гуфта мешавад, Додгоҳи ноҳияи Лахш ин сокини ноҳияи Раштро бар асоси даъвои Алишери Насриддин, яке аз ҳамдеҳагони Худоёровҳо, ки гӯё пиразани 66-сола ӯро лату кӯб карда бошад, ва тибқи моддаи 237 Қисми 3-и КҶ Ҷумҳурии Тоҷикистон гунаҳкор дониста, ҳукм содир кард.

Фарҳод Худоёров, фарзанди Мавҷигул Ғарибова дар суҳбат бо Azda tv аз ҳукми додгоҳ изҳори норозигӣ карда, гуфт, ки он фармоишӣ аст ва ҳукм одилона содир нашудааст.

Ӯ мегӯяд, модараш бегуноҳ аст ва танҳо барои талаби ҳақиқат, яъне барои ба ҷавобгарии ҷиноятӣ кашида шудани қотилони бародарзодааш, Алиризо Худоёров талош мекард, додгоҳ чунин ҳукм содир кард.

“Худи муфаттиши ноҳияи Рашт Аҳёев Билол, ғайриқонунӣ нисбати модари ман парванда боз карда, аз чанд шоҳиди хусуматдор парвандаро тартиб додааст, ки билоихра додгоҳ модарамро ба 2 соли зиндон маҳкум кард.”, мегӯяд Фарҳод Худоёров.

Фарҳод Худоёров дар матлаби худ дар Фейсбук аз Президенти кишвар хоста буд, ки ҳокимияти судии кишварро барҳам диҳад. Azda tv сабаби чунин пешниҳодро аз ӯ пурсид ва дар посух гуфт:

“Вақте ҳокимияти судӣ фармоиш иҷро мекунад, мақомоти қудратӣ ва ё муфаттиши парванда шахсеро гунаҳкор ҳисобанд ва ҳарчизе, ки дар тафтишоти пешакӣ меояд, ҳамонро судя баррасӣ мекунад ва бидуни тағйир ҳукм мебарорад. Дар чунин ҳолат, вақте сухани муфаттиш барои судя қонун бошад ва аз ҳама боло истад, судя чӣ даркор аст? Муфтӯр чӣ лозим аст? Аз буҷети кишвар маош мегирад, вале ҳарчи мақомоти баландпоя бигӯяд ҳамонро мекунад.”

Ба гуфтаи Фарҳод Алишери Насриддин ва дигар нафароне, ки дар қатли бародарзодааш Алиризо Худоёров гумонбаранд, аз хешони мақомоти баландпоя ҳастанд, аз ҷумла Алишери Насриддин аз наздикони Маҳмадтоир Зокирзода, раиси Маҷлиси намояндагони Маҷлиси Олӣ мебошанд ва аз ин хотир додгоҳҳо фармоиш иҷро карда, корро ба нафъи гумонбарон тамом кунанд.

Фарҳод мегӯяд, бо вуҷуди он ки сабти эътирофи Синоҷони Искандарро, ки иқрор мекунад дар куштори Алиризо Алишери Насриддин ҳам даст дошт, дар даст доранд ва ба додгоҳ пешниҳод кардаанд, вале додгоҳ онро ба инобат нагирифтааст.

Хабарро таблиғ кунед:

БЕШТАР БИХОНЕД
БЕШТАР БИХОНЕД

Тоҷикистон: 8 миллиард барои обу ҳаво

Кумитаи ҳифзи муҳити зисти Тоҷикистон ва Бонки Осиёии Рушд...

Боздошти Шокирҷон Ҳакимов, муовини раиси ҲСДТ

Шокирҷон Ҳакимов, муовини якуми раиси Ҳизби сотсиал-демократи Тоҷикисон аз...

Боздошти марди 59-солаи тоҷикистонӣ дар Олмон ба иттиҳоми қатли ҳамсар

Мақомоти олмонӣ як марди 59-солаи тоҷикистониро бо иттиҳоми қатли ҳамсараш боздошт кардаанд.

Баъди латукӯби сарбоз раиси суди ноҳияи Шамсиддин Шоҳин аз вазифа барканор шуд

Раиси суди ноҳияи Шамсиддин Шоҳини вилояти Хатлон, ки як сарбозро латукӯб карда буд, аз вазифа барканор шуд.