Вазорати корҳои дохилии Русия аз аввали соли 2024 беш аз 43 ҳазор иҷозати корӣ (патент)-и муҳоҷиронро бекор кардааст.
Намоянади ВКД Ирина Волк сабаби бекор кардани иҷозатномаҳои кориро ба “сари вақт” пешниҳод накардани маълумот аз ҷониби муҳоҷирон дар бораи фаъолияти корӣ ба ВКД-и Русия рабт додааст.
Ба гуфтаи ӯ, дар муқоиса бо соли гузашта теъдоди “патент”-ҳои бекоршуда исмол се баробар бештар аст. Аммо маълум нест аз ин теъдод чӣ қадараш ба муҳоҷирони кории тоҷик марбут аст.
Тибқи қонунҳои муҳоҷирати Русия, шаҳрванди хориҷӣ дар давоми ду моҳ аз рӯзи додани иҷозатномаи корӣ бояд ба Вазорати корҳои дохилӣ дар бораи ҷойи кораш огоҳинома пешниҳод намояд. Дар ҳоли пешниҳод накардани чунин огоҳинома, шаҳрванди хориҷӣ заминаи қонунии будубош дар хоки Русияро аз даст медиҳад ва дар аксар ҳолат аз ин кишвар ихроҷ карда мешаванд.
Гуфта мешавад, аз баҳори соли 2024 мақомоти Русия фишор болои муҳоҷирони кориро бештар карда, барои маҳдуд кардани фаъолияти онҳо қонунҳои зиёдеро қабул карда истодаанд. Ҳатто кори муҳоҷирон бо баҳонаи амниятӣ дар таксиронӣ дар аксар минтақаҳои ин кишвар манъ шуда, нархи иҷозатномаи корӣ ҳам гарон шудааст.
Инчунин мақомоти рус тартиби супоридани имтиҳонро барои донистани забони русӣ сахттар карда, дар охири моҳи август Ҳизби либерал-демократи Русия пешниҳод карда буд, ки ба муҳоҷирони бидуни тахассус иҷоза дода нашавад, ки зану фарзандонашонро бо худ ба Русия бибаранд.
Бино ба иттилои Вазорати корҳои дохилии Русия, то 1-уми сентябри соли ҷорӣ дар кишвар 6,2 миллион муҳоҷири корӣ сабти ном шудаанд, ки тақрибан 4,2% аҳолии Русияро ташкил медиҳад ва ҳамзамон дар ин кишвар 630 ҳазор муҳоҷири ғайриқонунӣ ба сар мебурдаанд.
Тибқи маълумоти Хадамоти Федералии омори давлатии Русия, муҳоҷирони корӣ аз Тоҷикистон 31 дарсади шумори умумии муҳоҷиони кории Русияро ташкил медиҳанд. Пас аз он муҳоҷирон аз Қирғизистон (10%), Украина (9%), Арманистон (9%), Қазоқистон (9%) ва аз Узбакистон (8%) будаанд.
