Дар шаҳри Панҷакент “Рамзи китоб” бо баландии 14 метр бунёд мегардад

Бино ба иттилои саҳифаи расмии фейсбукии ҳукумати шаҳри Панҷакент “Рамзи Китоб” бо баландии 14 метр дар маркази шаҳри Панҷакент қомат афрохта, ҳалқаи давраи поёнии деворпоя — 20 метр, ҳалқаи поёнӣ — 5,5 метр ва давраи болоӣ — 4 метрро ташкил хоҳад дод.

Ҳамчунин гуфта шудааст, ки он аз 5 сутунпоя — ишора ба номи қадимии Панҷакент, яъне шумораи “панҷ” ва “кат” аз забони суғдӣ – деҳа иборат мебошад.

Гуфта мешавад, дар ин сутунпояҳо нақшу нигор ва унсурҳои миллӣ ифода ёфтаанд. Дар болои сутунпоя давраи электронӣ ҷойгир аст, ки дар он мисраъҳо аз ашъори шоирони классик ва муосири тоҷик ҳамчун сатри равон мунтазам пахш мегарданд.

Аз болои давраи электронӣ кураи Замин бо ифодаи харитаи Тоҷикистон ва дар кунҷи чап номи Панҷакент омадааст. Дар атрофи кураи Замини тасвирёфта хомаву ранг ва китоби кушода нишон дода шудаанд.

Аммо ба назари коршиносон дар бунёди чунин сутунпояҳо маблағи зиёд масраф мешавад ва масъулон ҳам аз чунин иқдомот суиистифода намуда, маблағҳои зиёдеро ба қавле “обу лой” мекунанд.

Бунёди “Рамзи китоб” дар Панҷакент дар ҳолест, ки Тоҷикситон дар гирдоби қарзи хориҷӣ афтодаасту аз қарздиҳандагон хоҳиш карда, ки мӯҳлати баргардонидани маблағҳои қарзиро дарозтар кунанд.

Ҳамчунин корбарони шабакаҳои иҷтимоӣ ин иқдомро зери шарҳу баррасӣ қарор дода, навиштаанд, ба ҷойи бунёди чунин биноҳое, ки танҳо зарар ба буҷа аст, корхона ва ҷойҳои корӣ барои мардуми бекор муҳайё созанд, беҳтару хубтар аст.

Facebook

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.