Дар Тоҷикистон рӯзи 12 январ Facebook Instagram дастнорас шуданд

Дар Тоҷикистон рӯзи 12 январи соли равон дастраси ба шабакаҳои иҷтимоии Фейсбук ва Инстаграм, ки ду шабакаи пуртарафдор дар ҷомеаи Тоҷикистон дониста мешаванд, дастнорас гардид.

Илҳомҷон Атоев, муовини раиси Хадамоти алоқа ба Радиои Озодӣ гуфтааст, "система фаъол аст, мо ҳеч кор накардем". Баъзе аз ширкатҳои мобилии Тоҷикистон дар паёме ба муштариёни худ пеш омадани чунин вазъро ба "мушкили фаннӣ" (техникӣ) рабт додаанд.

Масъулони "Мегафон" ба муштариёни худ гуфтаанд, "дар серверҳои сомонаҳои иҷтимоии Instagram ва Facebook мушкилӣ дида мешавад. Вақти барқароршавӣ маълум нест."

Ин бори аввал нест, ки дар Тоҷикистон шабкаҳои иҷтимоӣ дастнорас мешаванд, пеш аз ин ҳам борҳо аз ҷониби Хадамоти алоқа пешниҳод шуда буд, ки шабакаҳои иҷтимоӣ, бахусус Facebook ба гуфтаи онҳо “андоз намесупоранд” бояд дар қаламрави Тоҷикистон масдуд шаванд. Ва ҳаргоҳе, ки ин шабакаҳо масдуд мешаванд, масъулони ширкатҳои мобилӣ ва ширкатҳои таъминкунандаи интернет баҳона пеш меоранд, ки мушкили фаннӣ рух додааст.

Аз дидгоҳи ҳомиёни ҳуқуқ шабакаҳои иҷтимоӣ яке аз василаҳои муҳими иттилоърасонӣ дар Тоҷикистон ба ҳисоб мераванд, ки баста шудани онҳо нақзи ҳуқуқи шаҳрвандон дастрасӣ ба иттилоот мебошад.

Бино ба иттилои расмӣ беш аз 3 миллион аҳолии Тоҷикистон ба Интернет дастрасӣ доранд.

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.