Бар асари як тирандозӣ дар шаҳри Прагаи давлати Чехия 14 нафар кушта шуда, 24 нафари дигар захмӣ шуданд.
Гуфта мешавад, ҳамлагар донишҷӯи бахши фалсафаи Донишгоҳи Карли Чехия буда, ҳамларо баъд аз зуҳри рӯзи панҷшанбе, 21-уми декабр дар дохили ҳамин факултет анҷом додааст. Худи ӯ низ дар натиҷаи задухурд бо пулис кушта шудааст.
Бино ба иттилои пулиси ин кишвар, ҳамлагар Дэвид Козак ном дошта, 24-сола буд ва зодаи шаҳри Кладно будааст ва ин шаҳр 30 километр дуртар аз шаҳри Прага ҷойгир аст.
Пулиси Чехия мегӯяд, ҳамлагар бо худ силоҳ мегардонд ва онро қонунӣ сабти ном карда буд. Пас аз ин ҳодиса, пулис Дэвид Козакро дар қатли падари худаш гунаҳкор меддонист. Гуфта мешавад, чанд рӯз пеш аз ҳамлаи Донишгоҳи Карл дар шаҳри Кладно ҷасади падари Козакро пайдо карданд, ки бо тири туфанг кушта шуда буд.
Мақомоти Чехия ин ҳамларо “фоҷеаи даҳшатнок” хонданд. Аз ҷумла, вазири корҳои дохилии ин кишвар Вит Ракусан дар суҳбат бо хабарнигорон гуфта, ки “ин тирандозӣ ба терроризми байналмилалӣ ҳеч рабте надорад”. Ӯ ҳамчунин қайд карда, ки аз амали ин ҷавон дар ҳолати шок қарор доранд, зеро “таҳқиқоти пулис нишон дод, ки оила Дэвид хеле оилаи табиӣ ва ором будаанд ва ин писар чӣ гуна ба ин иқдом даст задааст, ҳама дар ҳайратанд.”
То ҳол ангезаи асосии ин ҳамла маълум нашудааст, танҳо гуфта мешавад, ки ин ҷавони донишҷӯ бо худ қонунӣ силоҳ мегардонд.
Ба чунин кушторҳои дастаҷамъӣ даст задани ҷавонон дар бархе кишварҳо солҳои ахир афзоиш ёфтааст. Мутахассисони равоншиносӣ сабаби чунин амалҳои ҷиноиро аз ҷониби ҷавонон дар таъсири филмҳо ва бетаваҷҷуҳи волидайни дар тарбияти кӯдакон онҳо медонанд.
