Даргузашти ду табиби тоҷик дар шаҳри Ал-Мукалои Яман

Бино ба навиштаҳои расонаҳо ду табиби шаҳрвандони Тоҷикистон - яке 49-сола ва дигаре 56-сола дар Яман бар асари сактаи қалбӣ ва мағзӣ дар як рӯз аз олам даргузаштаанд. Гуфта мешавад, ҷасади онҳоро дар шаҳри Ал-Мукаллои вилояти Хазрамавт дафн кардаанд.

Бино ба навиштаи Радиои Озодӣ ин табибони тоҷик тариқи ширкати “Здравэкспорт"-и Русия барои кор ба Яман рафта буданд.

Намояндаи ширкати "Здравэкспорт"-и Русия Манучеҳр Абдуев ба Радио Озодӣ гуфтааст, "Ҷамшед Бегалиев ва Саидмуҳиддин Тошев чанд сол боз дар шифохонаи хусусии “Ибни Сино” дар шаҳри Ал-Мукалло кор мекарданд. Бегалиев ҷарроҳ ва Тошев анестезиолог буданд".

Беморхонаи хусусии “Ибни Сино” дар шаҳри Ал-Мукаллои Яман. Сурат: Фейсбук

Абдуев гуфта, ки бо ризоияти хешовандон табибони тоҷикро дар Яман ба хок супоранд.

“Аздо тв” барои ҳақиқати ин хабар талош кард, вале муяссар нашуд, ки бо масъулони беморхонаи марказии “Ибни Сино”-и шаҳри Ал-Мукалло тамос барқарор кунад. Аммо худи беморхона дар саҳифаи расмии фейсбукяш рӯзи 3 январ навишта, ки табибони фавтида шаҳрвандони Тоҷикистон буда, аз яке Саид ва аз дигарӣ Ҷамшед ном бурдааст.

Ба навиштаи ин беморхона Саидмуҳиддин ҳамчун табиби анестезиолог дар беморхонаи марказии “Ибни Сино” ва Ҷамшед дар беморхонаи Ад-Дис Аш-Шарқия ҳамчун ҷарроҳи умумӣ кор мекардаанд.

Аммо дар шарҳи вафоти ин ду табиби тоҷик омада, ки “Ҷамшед дар меҳмонии дӯсташ Саид буд ва соати 4:30 субҳ бемор мешавад, вале табибон онро наҷот дода наметавонанд ва вафот мекунад, аммо баъд аз зуҳри ҳамон рӯз Саид ба фироқи дӯсташ тоб наоварда аз шиддати ғаму андӯҳи зиёд қалбаш мезанад ва бо ҳамин ӯ низ аз олам дармегузарад. Ва то омода шудани асноди онҳо барои фиристодан ба ватанашон ҷасади ҳардуяшон дар сардхонаи беморхона гузошта шуд”, - омадааст дар изҳороти ҳайати табибони беморхонаи марказии “Ибни Сино”.

Ҷамшед Бегалиев ва Саидмуҳиддин Тошев Сурат: Фейсбук

Беъзе огоҳони умур ба фарзия фавти ин ду пизишк, ки гӯё ҳарду дар як рӯз яке бо сактаи қалбӣ ва дигаре бо сактаи мағзӣ фавтидаанд, шубҳа доранд. Онҳо мегӯянд, чунин эҳтимол ҳам вуҷуд дорад, ки онҳо аз ҷониби ҷангҷӯёни силоҳбадаст кушта шуда бошанд. Чун шаҳри Ҳазрамавт то ҳол дар тасарруфи ҷангҷӯёни наздик ба гурӯҳи ДОИШ қарор дорад. Ва амният онҷо таъмин нест.

Соли гузашта низ як зани пизишки тоҷик чанд моҳ дар асорати чунин гурӯҳҳо буд, ки баъдан ӯро раҳо карданд.

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.