Дар як даргирии мусаллаҳона дар Доғистон чанд сокини маҳаллӣ 3 пулиси роҳро куштанд.
Ин ҳодисаи тирпарронӣ 5-уми май дар Махачқалъаи Доғистон байни афроди ношинос ва полис рух додааст. Ба гуфтаи расонаҳо, дар ин даргирӣ 3 корманди пулис ва 2 муҳоҷим кушта шуда, чанде аз раҳгузарон, аз ҷумла як духтари 17-сола маҷруҳ шуданд.
Ба гузориши телеграм-канали “RIA Dagestan”, Вазорати корҳои дохилии Доғистон мегӯяд, дар яке аз кӯчаҳои Махачқалъа кормандони пулис хостанд мошинеро ногоҳ доранд, вале як нафар аз дохили мошин ба сӯи онҳо оташ кушояд ва 3 нозири роҳро кушт.
Пас аз ин ҳодиса байни нерӯҳои пулис ва афроди ношинос тирпарронӣ сурат мегирад. Дар наворҳои нашршуда дида мешавад, ки ду тараф байни ҳамдигар оташ мекушоянд. Эҳтимол меравд ин саҳна пас аз ҳамлаи муҳоҷимон ба нозирони роҳ бошад.
Аммо Вазорати тиндурустии Доғистон мегуяд, дар пайи ҳамла танҳо яке аз пулисҳо кушта шуда, ду нафари дигар ба шиддат маҷруҳ ва айни ҳол дар бемористон бистарӣ ҳастанд.
Ҳамчунин дар расонаҳо наворҳое пахш шудаанд, ки дида мешавад, тирандозӣ байни кормандони полис ва афроди ношинос рух медиҳад ва раҳгузарон пинҳоншуда ба тамошои саҳна машғуланд ва гоҳо ба пулис кумак мерасонанд. Эҳтимол захмӣ шудани шаҳрвандони оддӣ дар ҳамин асно бошад.
Дертар Вазорати корҳои дохилии Доғистон хабар дод, ки ду нафар аз муҳоҷимон кушта шуда, боқимондаи онҳо фирор карданд ва мақомот ба дунболи онҳо мегардад.
Аммо ба гуфтаи дигар манобеъ ва расонаҳои маҳаллӣ, муҳоҷимон танҳо ду нафар буданд, ки тавассути пулис кушта шуданд.
То ҳанӯз мақомоти дахлдори Доғистон ному насаби афроди муҳоҷим ва далели ҳамлаи онҳо ба пулиси роҳро шарҳ надодааст.
