Бино ба иттилои расмӣ, 6-уми декабри соли 2023 собиқ мушовири Эмомалӣ Раҳмон Амиршо Миралиев дар синни 77-солагӣ дар бемористоне дар Туркия вафот кард.
Ба қавли расонаҳо, Амиршо Миралиев, собиқ раҳбари Дастгоҳи Президенти Тоҷикистон аз дарди сутунмуҳра раҷн мебурдааст. Вай ба хотири табобат як ҳафта пештар ба бемористоне дар шаҳри Истанбули Туркия рафта буд. Баъд аз ҷароҳат, имрӯз вафот кардааст.
Дар назар аст, тобути чоркарата вакили парлумони Тоҷикистон Амиршо Миралиев имрӯз ба Тоҷикистон оварда, пагоҳ, 7-уми декабри соли ҷорӣ дар зодгоҳаш ноҳияи Данғара ба хок сипурда мешавад.
Марги яке аз ёрони наздики Президенти Тоҷикистон дар бемористоне дар Туркия мавҷи вокунишҳоро дар шабакаҳои иҷтимоии тоҷикӣ ба вуҷуд овардааст. Бархе ҷонибдорони ҳукумат ӯро тавсифу тамҷид карда ходими давлатӣ ва марде қонунмеҳвар мегӯянд, вале бархеи дигар баръакс, собиқ раиси вилояти Хатлон Амиршо Миралиевро яке аз поягузорони зулму ноадолатӣ ва ҳомиёни мубориза алайҳи арзишҳои исломӣ дар даврони режими Эмомалӣ Раҳмон медонанд.
Инчунин гурӯҳе аз корбарони шабакаҳои иҷтимоӣ низ таблиғоти ҳукуматро дар робита ба беҳтар шудани вазъи низоми тандурустӣ дар Тоҷикистон зери суол қарор дода, гуфтаанд, ки агар ин ҳама суханҳои ҳукумат ва ҷонибдорони он дуруст бошанд, чиро наздикони Эмомалӣ Раҳмон, ба мисли Амиршо Миралиев барои табобат ба бемористонҳои ватанӣ муроҷиат накарда, балки ба Туркия рафтааст?
