Шаби 12 ба 13-уми январи соли ҷорӣ дар шаҳри Душанбе маҳбуси сиёсӣ ва фаъоли зодаи Бадахшон Қулмамад Паллаев дар дохили зиндон даргузашт.
Анора Саркорова, рӯзноманигори шинохтаи кишвар дар истинод ба манобеаш менависад, ки тайи чанд ҳафтаи охир Паллаев аз дарди шадиди меъда ва шикам шикоят мекард, аммо маъмурияти зиндон ҳама дархостҳои кумаки тиббӣ ба ин маҳбуси сиёсиро нодида гирифаанд ва ба ӯ тавсия додаанд, ки “сабр кунад”.
Гуфта мешавад, ки чанд соат пеш аз маргаш Қулмамад Паллаев дучори хунравии шадид, дарунравӣ, қайкунӣ ва дарди шадиди меъда шудааст, аммо кормандони зиндон чорае нандешидаанд.
Наздикони ин маҳбуси сиёсӣ гуфтаанд, ки Паллаев пеш аз зиндон гирифтори бемории меъда набуд.
Қулмамад Паллаев, сокини 50-солаи ноҳияи Рӯшон, фаъоли шаҳрвандӣ ва яке аз иштирокчиёни эътирозҳои осоишта дар маркази ноҳияи Вамар дар соли 2022 буд.
Ӯ моҳи майи соли 2022 дар пайи як амалиёти низомӣ дар ноҳияи Рӯшони Вилояти Мухтори Кӯҳистони Бадахшон, ки дар ҷараёни он даҳҳо ғайринизомӣ кушта ва беш аз 300 нафар боздошту шиканҷа ва ба муҳлатҳои тӯлонӣ зиндонӣ гардиданд, аз ҷониби мақомоти Тоҷикистон боздошт шуда буд.
Қулмамад Паллаев вақти тафтишот ва дар зиндон мавриди шиканҷаи бераҳмона қарор гирифтааст. Хонаводаи ӯ низ таҳти таъқиби мақомоти Тоҷикистон қарор гирифта, тибқи гузоришҳои таъйиднашуда, кормандони Кумитаи давлатии амнияти миллии Тоҷикистон писари ноболиғи Паллаевро шиканҷа кардаанд.
Мақомоти кишвар ин фаъоли фавтидаро ба терроризм, куштор ва хиёнат ба Ватан муттаҳам намуда буданд, аммо наздиконаш иттиҳомоти мақомотро сохтаву бофта медонанд.
