Музаффар Давлатмиров, рӯҳонии маъруфи 61-сола аз Вилояти Мухтори Кӯҳистони Бадахшон (ВМКБ), рӯзи 25-уми июни соли ҷорӣ дар зиндони шаҳри Ёвон даргузашт.
Бино ба иттилои манобеи “Pamir Inside”, сабаби марги ӯ мушкилоти ҷиддии саломатӣ будааст, ки бар асари бемории қанд ба вуҷуд омадааст. Давлатмиров қаблан борҳо аз вазъи саломатиаш ба масъули зиндон шикоят кардааст, вале ба ӯ кумаки зарурии тиббӣ расонда нашудааст.
Марги Давлатмиров аллакай сеюмин ҳолати фавти зиндониёни сиёсӣ аз ВМКБ дар зиндонҳои Тоҷикистон дар як соли охир ба шумор меравад. Пештар Кулмамад Паллаев, фаъоли ҷамъиятӣ аз ноҳияи Рӯшон ва Аслан Гулобов аз Хоруғ, ки ҳар ду маҳкум ба ҳабси абад буданд, дар зиндон фавтиданд.
Мақомот то ҳол дар робита ба даргузашти ин се зодаи Бадахшон расман чизе нагуфтаанд.
Ёдовар мешавем, ки Музаффар Давлатмиров, рӯҳонии шинохта ва аз пайравони мазҳаби Исмоилия дар Бадахшон соли 2022 бо иттиҳоми сохтаи “даъватҳои оммавӣ ба фаъолияти ифротгароёна” ба панҷ соли зиндон маҳкум шуда буд. Аммо сабаби асосии боздошти ин рӯҳонӣ хондани намози ҷанозаи се раҳбари мардумии ин вилоят Мамадбоқир Мамадбоқиров, Зоир Раҷабов ва Хурсанд Мазоров, ки мақомот онҳоро кушта буд, мебошад.
Гуфта мешавад, Давлатмиров яке аз руҳониёни ангуштшумори ВМКБ маҳсуб меёфт, ки мавқеи шаҳрвандии равшан дошт ва дар байни мардуми минтақа аз эҳтироми зиёд бархӯрдор буд. Номи ӯ борҳо дар гузоришҳои Комиссияи озодиҳои динии ИМА ёд шуда, созмонҳои байналмилалии ҳуқуқи инсон, аз ҷумла коршиносони СММ, борҳо хостори озодии ӯ шуда буданд.
