Сокинони шаҳру ноҳияҳои Тоҷикистон аз ширкати “Барқи тоҷик” талаб доранд, ки имшаб барои тамошои футболи дастаи “Истиқлол”-и Душанбе ва “Ан-Наср”- и Арабистони Саудӣ, барқро қатъ накунанд.
Дар ҳоле мухлисони футбол аз ширкати “Барқи тоҷик” ин дархостро мекунанд, ки имрӯз бозиҳои даври дуюми марҳилаи гурӯҳии Лигаи Қаҳрамонҳои Осиё шуруъ мешаванд, вале бозиҳо дар соате пахш мешаванд, ки аксар минотиқи кишвар дар он вақт барқ надоранд.
Гуфта мешавад, имшаб соати 23:00 ба вақти Тоҷикистон бозӣ миёни дастаҳои “Истиқлол” ва “Ан-Наср” дар варзишгоҳи шаҳри Риёзи Арабистони Саудӣ баргузор мешавад.
Дар дастаи “Ан-Наср”-и Арабистони Саудӣ футболбозони шинохтаи ҷаҳон Криштиану Роналдо ва Садио Мане бозӣ мекунанд ва ба ҳамин хотир мухлисони футболи тоҷик мехоҳанд, бозии дастаи “Истиқлол”-и кишварро бо ин тим бубинанд.
Қаблан ҳам сокинон аз минтақаҳои гуногуни Тоҷикистон, аз ҷумла Суғд, Хатлон, ВМКБ ва ҳатто Душанбе ба расонаҳо аз набуди барқ дар фасли тирамоҳ шикоят карда буданд.
Ширкати “Барқи тоҷик” бо пахши изҳороте “лимит”-и нерӯи барқро дар кишвар тасдиқ карда, онро мисли ҳамеша ба”камшавии маҷрои дарёҳо ва захираҳои об” ва “зиёд шудани талабот ба нерӯи барқ” номида, онро барои таъмини сокинон бо барқ дар фасли зимистон зарурӣ хонда буд.
