Русия барои бозпас гирифтани манотиқи аз дастдодааш даст ба домони шаҳрвандони ҷадиди худ шудааст.
Бино ба иттилои расонаҳои русӣ, давоми як ҳафтаи ахир даҳҳо нафар аз муҳоҷироне, ки тоза шаҳрвандии Русияро дар Маскав дарёт кардаанд, барои ҳозир шудан ба комиссариатҳои ҳарбӣ ва сабти ном кардан даъват шудаанд.
Пеш аз ин Думаи давлатии Русия Қонун дар бораи маҳрум сохтан аз шаҳрвандии Русияро барои сабти ном нашудан дар артиш қабул карда буд. Дар он санад ҳамчунин пешбинӣ шудааст, ки шуъбаҳои корҳои дохилӣ ҳам маълумотро дар бораи мардони довталаб барои гирифтани шаҳрвандӣ ба феҳрист ё реестри қайди ҳарбӣ ирсол мекунанд.
Вакилони Думаи давлатии Русия охири моҳи июли соли ҷорӣ лоиҳаи қонунеро қабул карда буданд, ки бар асоси бандҳои он ин имконро барои мақомот фароҳам кунад, афроде, ки аз сабти ном кардан дар сафи артиш сарпечӣ мекунанд, аз шаҳрвандии Русия маҳрум хоҳанд шуд.
Инчунин, чанд рӯз қабл низ хабар дода шуда буд, ки Думаи давлатӣ метавонад тағйироте дар мавриди боло бурдани синни даъвати шаҳрвандони ҷадиди Русия ва то ду сол афзоиш додани муҳлати хидмати низомиро барои онҳо баррасӣ кунад.
Гӯфта мешавад ҳамчунин намояндагони шӯъбаи тафтишоти ҳарбии 516-и Маскав (ВСУ СКР) ҳамроҳ бо кормандони Раёсати корҳои дохилии ҳавзаи маъмурии шарқии Маскав барои мубориза бо муҳоҷирати ғайриқонунӣ рейдҳо анҷом додаанд. Рейд дар автовокзали назди истгоҳи метрои Щелковская дар шарқи Маскав ва хобгоҳҳои наздик ба он гӯзаронида шуда аст.
