Рӯзи 28 апрел дар ҷаласаи Маҷлиси намояндагони парлумони Тоҷикистон масъалаи “Дедовшина” ё бадрафторӣ дар артиш баҳсу баррасӣ шуд. Муовини якуми вазири дифои Тоҷикистон Эмомалӣ Собирзода дар ин мавзӯъ дар парлумон суханронӣ кард.
Ба гуфтаи вазири дифоъ, бадрафторӣ дар артиш аз оила ба вуҷуд омадааст ва он натиҷаи тарбияи нодурусти фарзандон дар оилаҳо мебошад. Ӯ гуфт:
“Дедовшина” дар артиш таваллуд нашудааст, он аз хона шуруъ мешавад. Дар як оила агар ду се фарзанд бошад, онҳо ҳам байни худ соз намегиранд.”
Собирзода афзуд, аммо мардум нисбати артиши миллӣ нигоҳи бад доранд.
Дар ҳамин ҳол Саидҷаъфар Усмонзода, вакили парлумон аз ҲДТ гуфт, ки “ҷавононро падару модар калон мекунанд, ба хидмати ҳарбӣ равон мекунанд, аз он тараф мурдаашонро бармегардонанд. Ин кори осон нест. Тасаввур кунед, ки фарзанди мову Шумо дар ин ҳолат бошад.”
Инкори “дедовшина” ва ё бадрафторӣ ва сарбозозорӣ дар артиши Тоҷикистон аз забони як мақомдори баланди соҳаи низомии кишвар дар ҳоле садо медиҳад, ки ин қазия яке аз масъалаҳои доғи беш аз ду даҳаи ахир дар Тоҷикистон мебошад.
Ба хотири он ки наваскарон дар артиш бераҳмона мавриди шиканҷа қарор мегиранд ва ё ҳар сол хабари марги чанд сарбоз расонаӣ мешавад, падару модарон дигар намехоҳанд фарзандошон ба хидмати артиш раванд. Ва худи ҷавонон низ аз хидмат фирор мекунанд.
