Бино ба иттилои Кумитаи ҳолатҳои фавқуллодаи Ҷумҳурии Тоҷикистон дар ноҳияи Данғара ба сабаби истеъмоли консерваи бодиринг ва помидор 11 нафар узви ду оила аз деҳаи Меҳргони ҷамоати И.Шарипов заҳролуд гардидаанд, 9 нафари онҳо фавран дар беморхонаи ноҳияи Данғара бистарӣ карда шуданд.
Дар хабар гуфта шудааст, ки рӯзи 1-уми ноябр як нафари онҳо, ки 23 сол дошт, даргузаштааст.
“Ҳолати се нафари дигар аз заҳролудшудагон, ки аз 15 то 47 сол доранд, вазнин арзёбӣ гардидааст. Вазъи саломатии 5 нафари дигар хубтар гардида ва ҳоло ҳамаи онҳо дар беморхона бистарӣ буда табобат мегиранд”, – омадааст дар хабар.
Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон ба сокинони кишвар муроҷиат намудааст, ки вақти омода намудани консервҳои мевагӣ талош кунанд қоидаҳои бехатариро риоя намоянд.
