Ду рӯз муҳлат, ё билетҳоро арзон мекунед, ё парвозҳои чартерӣ қатъ мешаванд

Агентии авиатсияи граждании Тоҷикистон ширкатҳои ҳавопаймоии Русияро барои поин овардани нархи билетҳои парвозҳои чартерӣ ду рӯз муҳлат додааст.

Дар ҳоли иҷро нашудани талаб, барои манъ намудани парвозҳо чораҳои дахлдор андешида мешавад. Дар ин бора “Азия-Плюс” аз қавли Икром Субҳонзода, раиси Агентии авиатсияи граждании Тоҷикистон хабар дод.

Рӯзи 22 апрел Агентии авиатсияи гражданӣ ҷаласаи баргузор кард, ки дар он ширкатҳои ҳавопаймоии Русия: «Уральские авиалинии», UTair, «Сибирь» ва «Северный Ветер» иштирок карданд.

Субҳонзода дар ин нишаст иброз дошта, ки аҳолӣ барои харидани билетҳои гарон пул наёфта дар ин шароити вазнини иқтисодӣ маҷбур шудаанд аз бонкҳо қарз гирифта билет бихаранд.

“Ширкатҳои ҳавопаймоиро зарур аст, ки бар ивази баланд бурдани нархи чиптаи ҳавопаймоӣ шумораи парвозҳоро зиёд намоянд. Дар ин самт, Агентии авиатсияи гражданӣ омода аст, ки ҷиҳати иҷозати саривақтии парвозҳо дар асоси қарорҳои дахлдори Ситоди ҷумҳуриявӣ чораҳои дахлдор андешад”, гуфт Субҳонзода.

Ӯ мегӯяд, он нархномае, ки ширкатҳои русӣ балои билетҳои чартерӣ муайян кардаанд, онро риоя накарда билетҳоро бо нархи гарон мефурӯшанд. Ҳамчунин Субҳонзода аз намояндагони сохторҳои қудратӣ хоста, ки танзими нархи чиптаро назорат баранд.

“Аз рӯйи натиҷаҳои ҷаласа қарор шуд, ки ширкатҳои ҳавопаймоии Русия дар зарфи 2 рӯз бояд ҷиҳати поён бурдани арзиши билети ҳавопаймоӣ чораҳои дахлдор андешанд ва дар сурати поён набурдани арзиши чипта, Агентии авиатсияи гражданӣ ҷиҳати манъ намудани парвозҳои чартерӣ чораҳои дахлдор меандешад”, омадааст дар хабар.

Ёдовар мешавем, бо қарори Ситоди мубориза бар зидди каронавируси Русия аз таърихи 1 апрел парвозҳои мунтазам байни Тоҷикистону Русия барқарор шуд ва тибқи нақшаи аввалӣ ҳафтае як маротиба ширкати русии "UTair" ва як маротиба ширкати "Сомон Эйр" мусофиронро ба Русия мебаранд.

Дар баробари гарон будани нархи парвозҳои чартерӣ мардум аз гаронии нархи билети парвозҳои доимӣ шикоят мекунанд.

Чанде пеш як сокин аз вилояти Хатлон дар суҳбат ба "Аздо тв" гаронии билетҳоро тасдиқ карда гуфта буд, ки дар маркази вилоят, шаҳри Бохтар билет пайдо карда натавониста, билетфурӯшон гуфтаанд, система фаъол нест ба Душанбе раванд. Ӯ мегӯяд, 4 рӯз дар Душанбе навбатпоӣ карда ва талош намуда, ки билет харад, вале натавонист.

Ӯ гуфт: "Баъзе шиносҳоям то 10 ҳазор сомонӣ билет хариданд, ҳатто медонам онҳоеро, ки то 12 ҳазор ҳам хариданд. Аз Шумо хоҳиш, расонед ба гӯши мақомдорон, ки билетро арзон кунанд".

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.