Ду ҷавони зодаи Тоҷикистон, ки шаҳрвандии Федератсияи Русияро доранд, аз бинои комиссариати ҳарбии шаҳри Маскав фирор кардаанд.
Бино ба иттилои Сарраёсати Кумитаи тафтишотии шаҳри Маскав, ин ду ҷавон (соли таваллуди яке 2004 ва дигарӣ 2005) солҳои 2019 ва 2022 шаҳрвандии ин Русиро дарёфт карда будаанд ва ба хидмати ҳатмии ҳарбӣ даъват шудаанд. Аммо 22-уми октябри соли ҷорӣ ин ду ҷавон аз як комиссариати ҳарбӣ, ки мебоист аз онҷо онҳоро ба қисми низомие барои хидмат мефиристоданд, фирор кардаанд.
Кумитаи тафтишоти Русия номи ин ду ҷавонро расонаӣ накардааст, аммо шабакаи телеграмии “Shot” номи онҳоро Муҳаммаднабӣ С. ва Мақсуди М. гуфтааст.
Муҳаммаднабӣ аз хонаи зисташ пайдо ва аз ҷониби мақомоти рус боздошт шудааст. Мақсудро мақомоти интизомӣ то ҳол ҷустуҷӯ доранд.
Нисбати ин ду ҷавон, бо иттиҳоми саркашӣ аз хидмати ҳарбӣ, яъне моддаи 328 қисми 1 парвандаи ҷиноӣ боз шуда, ба онҳо то ду соли зиндон таҳдид мекунад.
Хабари фирори ин ду ҷавони тоҷик аз комиссариати ҳарбии шаҳри Маскав дар ҳоле расонаӣ мешавад, ки мақомоти интизомии ин кишвар чанд вақти охир дар шаҳру ноҳияҳои Русия миёни муҳоҷирон ва хориҷиён тафтишот гузаронда, онҳоеро ки шаҳрвандии ин кишварро доранд, ба комиссариатҳои ҳарбӣ бурда истодаанд.
Инчунин Александр Бастрикин, раиси Кумитаи тафтишотии Русия пешниҳод кардааст, ки дар сурати сарпечӣ аз иштирок дар ҷанги Украина “муҳоҷирон” аз шаҳрвандии Русия маҳрум карда шаванд.
