Эммануэл Макрон ба вируси COVID-19 мубтало шуд

Натиҷаи озмоиши коронаии президенти Фаронса Эммануэл Макрон мусбат эълон шуд. Кохи Илиса дар бораи лағви ҳама барномаҳои президент, аз ҷумла сафари ӯ ба Лубнон, расман хабар дод.

Тибқи изҳороти Кохи Илиса, Макрон барои як ҳафта дар худинзиво қарор мегирад, аммо ба корҳои ҳаррӯзаи худ ба таври фосилавӣ идома хоҳад дод.

Маълум нест, ки чӣ гуна Макрон ба вирус сироят ёфтааст. Масъулони Кохи раёсатҷумҳур дар ҳоли ҳозир тамосҳо ва иртиботи ҳафтаи гузаштаи ӯро таҳқиқ мекунанд.

Макрон бори охир дар ҷаласаи ҳукумат ширкат карда буд ва сарвазири Фаронса Жан Кастекс низ ба ин далел таҳти карантини эҳтиётӣ қарор гирифтааст.

Инчунин Эммануэл Макрон ҳафтаи гузашта дар нишасти ИА ширкат карда, рӯзи чоршанбе (16 декабр) бо сарвазири Португалия Антониу Коста мулоқот дошт.

Сарвазири Испания Педро Санчес, ки рӯзи душанбеи 14 декабр бо Макрон хӯроки нисфирӯзӣ хӯрд, эълом дошт, ки то 24 декабр карантин эълон мекунад.

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.