Президенти Тоҷикистон Эмомалӣ Раҳмон рӯзи 18 январ бо кадрҳои тозаинтихобаш ба вазифаҳои роҳбарикунандаи Прокуратураи генералӣ, Агентии назорати давлатии молиявӣ ва мубориза бо коррупсия, СРИҶҶ Вазорати адлия, Бонки миллӣ ва Вазорати рушди иқтисод ва савдо таъиншуда буданд, мулоқот намуд.
Тибқи иттилои хадамоти матбуоти президенти Тоҷикистон, бо фармони Эмомалӣ Раҳмон, Фирдавс Толибзода ва Мирҳаёт Ёқубзода муовинони раиси Бонки миллӣ таъин шуданд.
Бо қарори ҳукумати ҷумҳурӣ, Фарҳод Восидиён муовини вазири рушди иқтисод ва савдо таъин карда шуд.
Инчунин сардорони раёсатҳои Агентии мубориза бо коррупсия дар Вилояти Мухтори Кӯҳистони Бадахшон, вилояти Хатлон ва як қатор шӯъбаҳои дастгоҳи марказии ин Агентӣ таъин карда шуданд.
Прокурорҳои ВМКБ, ноҳияҳои Рашт, Сангвор, Ховалинг, Ҳамадонӣ, Б.Ғафуров ва ноҳияи Шоҳмансури шаҳри Душанбе иваз карда шуданд.
Бо фармони раисҷумҳури кишвар Маъруфҷон Бурҳониён аз вазифаи раиси суди ноҳияи Б.Ғафуров озод карда шуд.
Тибқи фармони Президент Абдувалӣ Шарифзода аз вазифаи Директори Муассисаи давлатии “Осорхонаи миллии Тоҷикистон” озод ва Аҳлиддин Ибодуллозода дар як фармони президент ба вазифаи директори нави Осорхонаи миллии Тоҷикистон таъин карда шуд.